auch den engen Gassen / vnd in einander dick gesteckten Gebäwen: Item / der Vnordnung in der Statt; die Schuld geben wollen. Wird jetzt nach / vnd nach / wider erbawet. Es hat ein herrliche schöne Kirch / ein sehr grossen reichen Spital / wolerbawtes Rathhauß / vnd herrliche Weinkeller / allhie gehabt / vnd zum Theil noch; vnd ist das besagte viereckicht auf ErlinbäumePfäl / so nit vil höher / als der Statt Wall ist / mit 4. Thürn an den Ecken / starcken Mawren / tieffen Graben / darüber ein Auffziehbrücken nach der Statt gehet / erbawete Schloß / wol zu sehen / so vor dem Krieg ein wolbestelltes Zeughauß / vnd Rüst-Kammern / gehabt hat. Vnd wächßt vmb die Statt viel / vnd guter Wein / (dessen vor obgedachter Belägerung / ein sehr grosse Menge in der Statt solle gewesen seyn / ) so von dem gedachten Thal / der Ramsthaler) das Thal aber vom Wasser Rems den Namen hat / welche Raemsa jhren Vrsprung zu oberst in diesem Thal / vber der Statt Gmünd hat / vnd mitten durch das Thal laufft. Es gehören in das Schorndorffisch Ampt fünff vnd sechszig Dörffer. Vnd haben vorhin auch die Klöster Lorch / vnnd Adelberg / mit jhren Dörffern vnnd Weilern / in dasselbe gehört. Es ist der berühmbte Mann Jacobus Scheckius von hinnen bürtig gewesen. Dresserus de Urbibus Germaniae, Crusius in Annalibus Suevicis, & Relationes.
Anno 1646. ist diese Statt von den Frantzosen / belagert / vnnd mit Accord erobert; aber hernach / Ihrer Fürstl. Gn. Herrn Eberharden / Hertzogen zu Würtemberg / Anno 1650. restituirt worden.
Im Schwartzwald / zwischen Schiltach / Zimmern / MarienZell / vnnd Hornberg / am Wasser Gutach gelegen / ist / vor Jaren Gräflich Zimbrisch gewesen / jetzt aber Oesterreichisch; wie ich finde.
Sorethum, ein Praemonstratenser MönchsCloster / beym Vrsprung deß Wassers Schuß / so / nahendt Ereskirch / in den BodenSee fällt / zwischen Buchaw / vnd dem Schloß Aulendorff / (so den Herren von KönigsEgg gehörig / ) gelegen / so Anno 1187. von Bertingero; vnnd Conrado, Freyherren von Schußenriedt / auß einem Schloß / zu einem Closter gemacht worden; wie Romanus Hay, von hinnen bürtig / in seinem Horto Crusiano pag. 333 schreibet. Crusius part. 2 Annal. Suev. lib. 11. capite 16. nennet den Ersten Berengarium, vnnd setzet die Stifftung / zu Ehren Gottes / der Heyligen Jungfrawen Marien / vnnd S. Magni deß Beichtigers / geschehen / ins Jahr 1188. sagt auch / daß gedachter Berengarius ein Mönch allda / vnd mit dem ersten Probst Friderico in ein Grab gelegt worden seye. Der letzte Probst allhie / Conradus Rauber / ward / auff dem Baßlerischen Concilio zum ersten Abbt dieses Closters gemacht / vnnd starb Anno 1475. Es macht der Herr Abbt allhie einen Standt deß Reichs / vnnd Schwäbischen Craißes / dessen Monatlicher einfacher Anschlag ist zween zu Roß / vnnd vierzehen zu Fuß / oder achtzig fl. vnd zum Cammergericht Jährlich 83. Gulden.
Ein vornehmer Fleck / an der Sinckel / davon in dem sechsten Theil deß Theatri Europaei stehet / daß / als die Schweden / vnnd Frantzosen / wieder auß dem Bäyer-Land Anno 1648. gezogen / sie / den dreyssigsten Septembris Alt. Calenders jhren Plunder vber eine Lauffbrücke / zwischen den 2. jenseit deß Lechs / gelegenen Schlössern / Liechtenberg / vnnd Haldenberg / gehen lassen; die Armee aber sey noch biß gegen Abend hinder dem Wäldlein / bey dem Schloß Liechtenberg / in SchlachtOrdnung haltende / geblieben; hernach auch über den Lech / (ins SchwabenLand) gangen / vnd selbigen Tags gar spath zu Schwäbischen München / mit der Armee zu logiren kommen.
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 171. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_225.jpg&oldid=- (Version vom 31.7.2018)
