wirt (gotwil) auch fürgenomen / alß eyner / der warhafftige vnd Christliche ordenung erhelt / on welchen gott kein gebeth / ader vermeint gut werck ye gefallen hatt.
Gnediger her / die weil aller welt ougen / vff vns sehen / vnnd vnßere werck vnnd leben betrachten. Etliche vorbild vnd exempel tzehaben. Etliche nach reed tzu erdencken / wie gottliche sachen ye vnd ye nach reed gehort haben.
Demnach / wyl ich E. g. von den tzweyen letzten artickeln Christliche vrsachen (auß gottlicher vnd vnbetryglicher schriffte genhummen) furlegen. Vnd antzeigen das des Erbarn vnd achtbarn raths[1] fürnhemen eherlich / vnd gottlich ist / dem alle Christen sollen nach volgig werden / ehere / vnd lobe / nachsagen. Den ersten artickell wie ehr mir gefelt / hab ich / ym buchlin von dem Herlichen abend essen[2] / tzum teyll endeckt. Drumb wil ich nicht von der Euangelischen Messe ytzo schreiben. Vnd hoff die Christen werden nit ein klein frucht aus diesen beyden artickeln schopffen / vnd das E. g. mein bereit vnd gewertig gemüth E. g. nach meynem hochsten vormogen tzu dienen auch durch diß tzuschreiben werden vermercken. Da tzu ich E. g. geboten mich hiemit erbiet tzu vnthergeben. Meinem g. hern Christoffel wunsch ich alles gut durch Christum amen. Datum Wittenberg Montags nach Conuersionis Pauli ym xxii. J a r. E. G. diener Andres Bodenstein von Carolstatt.
i Das wir bilder in Kirchen vnd gots hewßern haben / ist vnrecht / vnd wider das erste gebot. Du solst nicht frombde gotter haben.
ii Das geschnitzte vnd gemalthe Olgotzen vff den altarien stehnd ist noch schadelicher vnd Tewffellischer.
iii Drumb ists gut / notlich / loblich / vnd gottlich / das wir sie abthun / vnd ire recht vnd vrteyl der schrifft geben.
Anmerkungen (Wikisource)
- ↑ Gemeint ist der Rat der Stadt Wittenberg.
- ↑ Gemeint ist wahrscheinlich die Flugschrift Von beiden Gestalten der heil. Messe etc.
Andreas Bodenstein von Karlstadt: Von abtuhung der Bylder. Wittenberg 1522, Seite 2. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Image-Karlstadt_Von_abtuhung_der_Bylder_02.jpg&oldid=- (Version vom 17.8.2016)
