sit ez nieman war nach sinem werde nimpt.
hat aber ez dv͛ werde hoch gemv̊te alleine wert
so wer alles daz geschehen dar an des mit[1] daz herze gert.
dv͛ mich twinget vnd ie herzecliche twanc.
mit der clage ich niht beiage
noch beiagete nie wan wilent smehen danc.
sol ich so mit leide vf liep gedinge lange leben.
so mac mir dv͛ liebe ir trost vil schiere vnschedeliche geben.
selic allez dc der sv̊zen stvnt geschac.
do si[2] dv͛ mit[1] selde git.
ein so sv̊ze selic wort zemir gesprech.
dc mich iemer werdeclicher vroide hohen mv̊z.
och nig[3] ir willecliche wirt mir statte vnz an den vůz.
sit ich von kinde alrest dienen kvnde.
dv͛ ich[4] so liep so gv̊t vnd och so wolgetan.
dc man den allen niht geliches vu͛nde.
si liebet sich von tage zetage
dest ir sitte. der ich so holdes herze trage.
dc si sv̊zer sv̊ze wenet.
dc man sich nœte nach der lieben sv̊zer liebe senet.
dem der si nach ir minne kan geminnen.
da bi so vil wunneclicher wunne lit
dc sich des nieman zende kan versinnen.
wie kvnde ich werden hohgemv̊t
an ir trost. sit si so gar nach winsche tv̊t
dvr dc han ich mich[5] ergeben
wan si wol gelieben kan dem man sin leben.
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 178. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_178.png&oldid=- (Version vom 7.1.2019)
