vnd die ain zeit ingehabt vnd sich hertzogen zuo österreich geschriben vn[d] die haubtstat des la[n]des wien ingehabt vn[d] dar in seßhaft gewesen vn[d] da abgeleibt ist. Ob das rechtlich beschehen sey gepürt mir meine[n] mu[n]d in die himel nicht zesetzen / sonder den almechtigen got zerichten / Dem selben sey lob vnnd ere yetz vnd ewigclichen Amen.
Hienach volget der obgemelten Cronig Eins yeglichen fürsten von österreich mit seinem namen vnderschaidlich regierung.
A. [Leopold I. der Erlauchte]
LEwpold[1] genant der durchleüchtig von geschlecht ain hertzog von Swaben / auch des geschlechtes des edlen vnd mechtigen graff Albrechten graffen zuo Babenberg dem obbena[n]ten Lewpolden warde nach abgang herren Rüdigers von Pechlarnn[2] marggrafen in österreich der an leib erben verschaiden ist / verlichen von herren Hainrichen von Prausweig Römischen kü[nig] das benant land österreich Nach cristi gepurd .ix.c. vnd etliche iar / der egenant Lewpold gewan Melkh[3] das da zemal ain stettlin vnd gsloß was / genant die Eyßne purg vn[d] tryb do aus / den mechtigen herren Gyso / vn[d] erobert das gantz land österreich / vnd weittert das / vn[d] hat es geregiert vil jar gar loblich vnd hat auch da selbs zuo melkh auf das gsloß gestifft xij weltlich korherren[4] / vnd die nottürftigclich versehen. Hat gehabt zuo ainem gemahel fraw Reichkarten[5] hertzog Otten vo[n] Prawnsweig tochter / des obgena[n]ten künig hainrichs swester[6] / die ligt begraben zuo melkh im Closter / bey marggrafen Lewpolden ire[m] gemahel / vn[d] haben hinder in gelassen zwen sün / heinrichen vn[d] poppen.
B. [Heinrich I. der Widerspenstige]
HEinrich genant der widerspenig[7] / des obegemelte[n] marggraffen Lewpolds erstgeborner sun / der ander marggraf in österreich des geslechts / fieng an zuo regiere[n] das bemelt land österreich zuo hand nach seines vatern tod / vn[d] regieret die marich österreich bey xl iare[n] / wz dem Rö[mischen] reich vngehorsam vn[d] widerspenig / den machet der heilig kayser Heinrich[8] im vn[d] dem Rö[mischen] reich vndertenig / hielt sein fürstlichs geseß zuo melkh / bey seinen zeiten ward der heilig sant Colma[n][9] gemartert zuo Stockeraw[10] / der wz des pluotes der künig vo[n] Schotten / vn[d] ward aus geschefft marggraf Heinrichs / ausgraben zuo stockeraw / da selbs er anderhalb iar begraben was / auch anderhalb iar da selbs an ainem paum hieng / vn[d] vard von danen gar wirdigclich mit priestern vn[d] process / aüch allem volck gen melkh gefürtt / da selbs er gar ain schöne begrebnüß hat / der bena[n]t marggraf heinrich starb aines vnzeitigen todes Nach cristi gepurd .m. vn[d] xv iar / vn[d] het zuo gemahel fraw Schwenhilte[n][11] / vn[d] ligt begraben zuo melkh bey seine[m] gemahel / vater vn[d] muoter / verließ zwen sün albrechte[n] vn[d] ernste[n].[12]
C. [Poppo von Babenberg, Erzbischof von Trier]
POpp[13] ain ersamer gaistlicher herr Marggraff Lewpolds des durchleuchtigen ander sun / ward ertzpischoff zuo Trier / das er etliche iar gar erwirdigclich vn[d] wol geregiert hat / zuo den zeiten kayser hainrichs des dritten vn[d] milten / der bena[n]t bischof popp erwarb von seinem bruoder marggraff Hainrichen das er künig Petern von hungern[14] / genn hungern schicket den leichnam
- ↑ Leopold I. (um 940–994)
- ↑ Rüdiger von Bechelaren
- ↑ Melk an der Donau
- ↑ Stift Melk
- ↑ auch Reichgart, Richarda, Richwara, Richeza
- ↑ wohl falsch, sie wird meist als Tochter Graf Ernst vom Sualafeldgau angesetzt
- ↑ Heinrich I. († 1018)
- ↑ Kaiser Heinrich II.
- ↑ Hl. Koloman († 1012)
- ↑ Stockerau
- ↑ auf einer Grabsteininschrift des 13. Jh. als „Suanhilt“, aber ansonsten nicht nachweisbar
- ↑ Hier irrt Sunthaym und fügt eine Generation ein, die es nicht gab. Heinrich hatte keine überlebenden Kinder. Nachfolger wurde sein Bruder Adalbert.
- ↑ Poppo von Babenberg (986–1047), Erzbischof von Trier
- ↑ Peter Orseolo (um 1008–1046), König von Ungarn
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 11. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_11.jpg&oldid=- (Version vom 1.8.2018)
