zuo Steir[1] / vnnd sy hett kain kind mit im / darumb im der bemelt Ottacker das land zuo Steir übergab vnd schuoff[2] / Als man zalt nach cristi gepurd M.c. vn[d] xcij iar. Also ward der benant Lewpold hertzog von österreich / der erst hertzog ze steir des geschlechts / vn[d] regiert österreich loblich vn[d] wol xvj iar. vnd steir in dz ander iar / Er emfpieng österrich vo[n] kayser Fridrichen dem erste[n] / vn[d] steir von kayser Heinrich dem sechsten / des bemelte[n] kayser Fridrichs sun / Er bagabet auch dz gotzhaus zum heiligen kreütz mit den derffern Nidern sultz[3] vnnd Pawngarten auch mit ainem schönen wald / Er hat auch reichlich begabet das Closter zuo kötweig / der benant hertzog Lewpold wolt zum dritte[n] mal gezogen sein in das gelobt land über mer / da viel er sich vo[n] ainem pferd bey dem gsloß Gretz / vn[d] prach ain fuoß ab / an dem im ain vergifte plater entsprang / da durch im der fuoß abgenomen ward / dar nach nam er an sich ain munichs claid / vnd sprach / wolt got dz ich mit meinem stumpff solt waide[n] die schaff des gotzhaus / des heiligen kreütz / vnd gab auf da selbs in münichs clayder seinen gaist / Als man zalt nach cristi gepurd M.c. vn[d] xciij iar / vn[d] warde da selben zum heylige[n] kreütz im capitel begraben / Aber sein gemahel fraw Helena starb als ma[n] zalt nach cristi gepurd m.c. vn[d] xcix iar. verlies zwen sün Fridrichen vn[d] Lewpolden von den hernach geschriben steet.
Y. [Heinrich I. der Ältere, Herzog von Mödling]
HEinrich gena[n]t von medling der Elter[4] ain ersamer manlicher fürst / hern Heinrichen gena[n]t Jochsamergot des ersten hertzogen von österreich ander sun / vn[d] hern Lewpolden des tugentreichen hertzogen zuo österreich bruoder / hielt sein fürstlich geseß auf der purgk zuo medling / vnd ward gena[n]t hertzog Heinrich von medling / hielt inen die güeter vnder dem gepirg / Newdarff Medling Salenaw Dreskirchen Walterstoff vnd keysersperg. im ward Gumppoltzkirchen mit seiner zuogeheru[n]g geschaft von herrn Ottacker dem iüngern hertzogen zuo steir / dem dz bemelt guot auch andere güeter in österreich durch hern Lewpolden den tuge[n]treichen hertzogen zuo österreich vermorgengabt worden zuo fraw küngu[n]den seinem gemahel des bemelten hertzog Lewpolden tochter / der bemelt hertzog Heinrich vo[n] medling vn[d] sein bruoder Lewpold / warde[n] zuo ritter nach cristi gepurd M.c.lxxiiij iar / zuo den pfingsten als vor gemelt ist / der bena[n]t hertzog Heinrich fieng an zuo regieren sein herschafft vnder dem gepirg / nach cristi gepurd M.c. vn[d] lxxvij iar. vn[d] regiert die selben herschaft wol vn[d] schuon xlvj iar / vn[d] als ma[n] zaltt nach cristi gepurd m.c. vn[d] lxxvj iar / bey seines vaterß zeiten / ist der bemelt hertzog Heinrich vnd hertzog Lewpold sein bruoder in Merhern gezogen / vn[d] haben vmb Olmnütz vnd vmb Brün verderbt vn[d] verhert dz land weit vn[d] prait / vn[d] herr Sobesla hertzog zuo Behem / zoch vo[n] stund an in österreich vn[d] raubt vnd prant bey zwettel wz darumb wz / d[er] bemelt her Sobesla het in seyner geselschaft Saxsen. polauken hu[n]gern. mehrher. vn[d] behem / der bena[n]t hertzog Heinrich von medling / hat auch begabet / das gotzhaus des heiligen kreützes mit etlichen weingartenn / mit dem dorff Sultz / vnd etlichen huoben[5] Er het zuo gemahel fraw Reytza / aines künigs vo[n] Behem tochter vn[d] het mit ir ain ainige[n] sun / gena[n]t Heinrich vo[n] medling d[er] iünger Vn[d] der bemelt hertzog heinrich der elter / starb als man zalt nach cristi gepurd m.cc. vn[d] xxiij iar. vn[d] fraw Reytza sein gemahel / ligen bayde zum heiligen
- ↑ Ottokar IV. (1163–1192)
- ↑ Der Erbvertrag zwischen Ottokar IV. und Leopold V. wurde als Georgenberger Handfeste bekannt.
- ↑ Niedersulz im Weinviertel
- ↑ Heinrich I. der Ältere, Herzog von Mödling (um 1158–1223)
- ↑ Hufen, vgl. Grimm: Hufe
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 22. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_22.jpg&oldid=- (Version vom 1.8.2018)