iren hausfrawen vn[d] töchtern schön geziert zuo dem tantze / vnd als der tantz ain mal beschach da nam hertzog Fridrich die bestimbte[n] frawen Praunhilten vn[d] weyset sy in sein gemach vn[d] verpracht seinen willen mit ir / do das geschach / da giengen die burger zuo rat / vn[d] sandten vier erber aus in zuo dem fürsten / vn[d] liessen im sagen / dz er sich pald vmb den freuel aus der stat hüeb Also ward hertzog Fridrich des selben tages über die statmaur ausgelassen / vn[d] ritt gen starhenberg auf sein gsloß / Vn[d] als man zalt M.cc. vn[d] xl iar / kamen hertzog Fridrichen auf ain tag drey absag / vo[n] Hungern Behem vn[d] Payren / die er alle drey gar ring wag[1] / vn[d] in dem bestimbten iar vmb sant Mertins tag / kamen hertzog Fridrichen mere wie her Wentzla künig zuo Behem mit .M. pferde[n] vn[d] herr Vlrich hertzog zuo kernden mit .cc. pferden in sein land österreich getzogen weren / vnd legen mit höre bey der stat Laazefeld / da füeget sich der fürst genn Laa mit lxxij pferden vn[d] sendet überal vmb sein volck / vnd sein haubtleüt waren herr Bernhard vn[d] herr Heinrich geprüder / genant die Preysl / vnnd des künigs vo[n] Behem haubtleüt waren / herr Seyfrid vnd herr Cadolt brüeder genant die waisen / Also gewan hertzog Fridrich den sig / vnd der Behem vnd kerner warden vil erslagen / Vnd hertzog Fridrich fieng den fürsten von kernden mit seiner hand / vn[d] zwen edelman mit im Es warden auch der Behem vn[d] kerner der pesten ob .cc. gefangen / vnd warden geschetzt vmb groß guot vnd der streit beschach zwischen Stetz vn[d] Laa / der bemelt hertzog fridrich lies auf aine[n] tag alle klöster in seinem land österreich aufstossen vn[d] prechen / vn[d] wz er guottes dar in fa[n]d frömds vn[d] aige[n]s / das tailt er vnder sein dienstleüt Er na[m] dar zuo in allem seinem land von ainer huob oder lehen lx [Pfennig] / der benant fürst hat auch mit den kun vnd Tattern[2] bey pesst in hungern gestritteen / vnd in ritterlich abgesiget / vn[d] in dem obbestimbten iar M.cc. vn[d] xl iar Schrib kayser fridrich der ander / hertzog fridrichen von österreich vn[d] sendet im poten / das er zuo im kem / aber der hertzog verachtet die brief vnd vneret des kaysers poten / Er forcht auch die clag der daigen / denn er ir hab vnnd guot offt vnpillichen genomen hett / fraw Theodora sein muoter ain müemel kayser Alexen von kryechen durch mangel vnnd pruch ir leibs narung auch durch das sy nit in gefencknüß vonn hertzog Fridrichen irem sun gesetzt wurd / floch sy genn Behem zuo künig Wentzlab da von petrus de vineis meldung tuot / in seinen epistelln Vn[d] als hertzog Fridrich von dem bemelten kayser fridrich zuo im zuo komen offt berüfft ward / vnd nit kumen wolt vn[d] die kayserlichen prief vnd poten verachtet / zuo lest warden im durch den benanten kayser in gegenwürd vil fürsten vnnd herren des reichs abkünt vnd genomen / die land österreich Steir vnd krain / vn[d] alle sein fürstliche wirdikait vmb willen seiner vngehorsam vnd pösen regierung / wan es kamen dem kayser vil vnd mancherlay klagen von gaistlichen vn[d] weltlichen personen / vber den bena[n]ten hertzog Fridrichen / dar nach sendet der benant kayser zuo hertzog fridrichen sein potschafft vn[d] kunt im ab sein gnad / hilf vn[d] ratt / den selben poten ließ hertzog Fridrich fahen / vnd ließ in ser mishandlenn Doch zuo letzst ließ er in ledig / dar nach schluogen sich von im / Wien vn[d] ander stet / des geleichen sein dienstleüt in österreich Steir krain / vn[d] sandte[n] nach keyser fridrichen der kam mit vil fürsten vnd herren gen Wien do ward der kayser vnd die fürsten von den Wienern mit großen eren empfangen / es kamen
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 29. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_29.jpg&oldid=- (Version vom 1.8.2018)
