hat dem gotzhaus zuo dem heiligen kreütz vil guotes beweiset / Er hat inen geben wultzendorff vnd xiij hüeben darzuo Der benant hertzog Fridrich hat gestritte[n] zwen feltstreit mit herren Bela dem vierden künig zuo hungern Vnd in dem dritten feltstreit den hertzog Fridrich mit dem benanten künig strit an de[m] wasser genant die Leitta / an sant Veits tag Als man zalt nach cristi gepurd M.cc. vnd xlvj iar vn[d] löblich sig an dem bemelten künig vn[d] den hungern erlangt ward er mit ainem spies durch das angesicht gerant das er von seinem pferd kam vnd ertret ward / vnd ist ain zweifel ob er von veinten oder von freünden seines lebens beraubt worde[n] sey / fraw Theodora sein muoter starb vor laid am achten tag dar nach / Nach hertzog Fridrichs tod ward das edel loblich lannd österreich verwüest dz es kainen manlichen leiberben het / Vnd herr Vladisla marrgraff zuo Merhern von wegen seiner gemahel fraw Gerdrauten vo[n] medling warde hertzog zuo österreich / der starb kurtzlich on erben / vnd ward widerumb in sein land gefürt vnd da begraben / nach des abgang ward herr herma[n] marggraff zuo Baden[1] der bemelten fraw Gerdrauten vermehelt / Vnd regieret das benant land österrich etwevil zeit vnd gepar aus seinem gemahel fraw Gerdrauten ain sun genant Fridrich[2] / vn[d] ain tochter genant Agnes[3] Von den hernach gemelt wirt Darnach na[m] fraw Margreth[4] weilend herren Heinrichen Rö[mischen] künigs gelasne witib zuo gemahel / des bemelte[n] hertzog Fridrichs swester / herren Ottacker marggrafen zuo merhern / vn[d] hernach künig zuo Behem[5] der regieret österreich von wegen seiner hausfrawen Margrethen xxvj iar. in mitler zeit nam die obbestimbt fraw Gerdraut von Medling iren dritten man hern Roman künig zuo Reyssen[6] fraw Margrethen irem müemel zuo widerdrieß / vn[d] vermainet / durch hilff herren Bela des vierden künigs zuo Hungern / dz land österreich zuo erobern / Aber künig Ottacker vertryb sy aus dem land österreich vnd aus Steir / Vnd die bemelt fraw Gerdraut het mit irem gemahel künig Romano ain tochter genant Maria von der hernach gemelt wirt Vnd künig Romanus verließ fraw Gerdrauten seinen gemahel / vnd zoch widerumb gen Reyssen / Vnd die bemelt frew Gerdraut Starb in dem land zuo Meyssen in ainem frawen Closter in dem sy begraben ligt / Wnnd als man zalt nach cristi vnsers lieben herren gepurd M.cc. vnd lxxxiij iar / warde herr Ruodolf graf zuo Habspurgk erwelt zuo ainem Rö[mischen] künig / aintrechtigclichen vonn allen kurfürsten / Als er mit heres krafft vor der Stat Basel lag / Der bena[n]t künig Ruodolff hette ainen feltstreyt mit dem bemelten künig Ottacker / vmb die land österreich Steir Kernden vnnd Krain / Inn dem selben streit ward künig Otacker erschlagen / Darnach verlich der benant kü[nig] Ruodolff / die land österreich vn[d] Steir hern Albrechten seine[m] erstgebornen sun / Vo[n] dem selben Albrechten sein geboren vnd kome[n] / herr Fridrich der dritt Rö[mischer] kayser / künig ze Hungern vn[d] ertzhertzog zuo österreich / Vn[d] herr Maximilian Römischer Vnd zuo hungern künig / ertzhertzog zuo österreich / zuo Burgundi vn[d] Britania hertzog / des bemelte[n] kayser Fridrichs sun / die dan das bena[n]t land öster[reich] mit sambt dem Rö[mischen] reich Regire[n] seligclich auf heütige[n] tag / vn[d] hertzog Fridrich vo[n] öster[reich] d[er] streitper
- ↑ Hermann VI. (ca. 1225–1250), Markgraf von Baden
- ↑ Friedrich von Baden-Österreich (1249–1268), Markgraf von Verona und Baden
- ↑ Agnes von Baden-Österreich (1249–1295)
- ↑ Margarete von Babenberg (1204/05–1266)
- ↑ Ottokar II. Přemysl (ca. 1232–1278)
- ↑ Roman Danilowitsch Prinz von Halicz (od. Daniel Romanowitsch) herrschte u. a. über Rothreußen (vgl. A. C. A. Friederich: Historisch-geographische Darstellung Alt- und Neu-Polens, Stuhrsche Buchhandlung, Berlin 1839, S. 158 – Google)
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 31. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_31.jpg&oldid=- (Version vom 1.8.2018)