Hernach volgennd der durchleüchtigen hochgebornen fürsten vnd herren Sant Lewpolds des heiligen vn[d] milten marggraffen in österreich geslecht bemaheln / wer die von gepurd gewesen / Auch welichen fürsten vn[d] herren ir töchter verheyrat worden sein.
RIkchard ain weyse frume andechtige fürstin / ain tochter herre[n] Otten hertzogen von Praunsweig / die ward vermahelt herren Lewpolden dem durchleüchtigen von gepurd ain hertzog vo[n] Swaben / dem bena[n]ten Lewpolden warde verlihen die marggrafschafft österreich / von herr Heinrichen genant[1] vogler Römischen künig / vnd hertzogen zuo Praunsweig seinem swager / Als ma[n] zalt nach cristi vnsers lieben herren gepurd ix.c. vn[d] etliche iar / zehand nach abga[n]g weylendt hern Rüedigers vo[n] Pechlarn marggrafen in österreich / der on leib erben verschaiden ist / Der bemelt Lewpold gena[n]t der durchleüchtig Regieret die marggrafschafft österreich vil iar gar loblichen Vnd hette mit der bestimbten frawen Rikcharten zwen sün / herren Heinrichen den widerspenigen marggrafen in uosterreich / vnd herren Poppen Ertzpischoff zuo Trier / von frawen Rikcharten geslecht sein geporen vnd komen / herr Heinrich hertzog Otten sun von Praunsweig Römischer künig vnd vogler genant / der bemelten fraw Rikcharten bruoder / herr Albrecht graff zuo Pabenberg fraw Rikcharten swestersun / herr Ott der erst genant der groß des benante[n] Römischen künig Heinrichs sun Römischer kayser / her Bru[n]no ertzpischoff zuo kölen / vn[d] her Heinrich hertzog zuo Pairn des obgemelte[n] kayser Otten bruoder / herr Lutolff hertzog zuo Swaben / her Wilhalm ertzpischoff zuo Mentz / her Ott der ander gena[n]t der pluotuergiesser Rö[mischer] kayser all drey kayser Otten des erste[n] sün / herr Ott der dritt genant die wunder der welt Römischer kayser Kayser Otten des andern sun / der heilig sant Heinrich Römischer kayser hertzog zuo Pairn kayser Otten des ersten bruoder sun / her Hugo graff zü Paryss vnd nachmaln künig zuo Franckreich / kayser Otten des ersten swester sun / her Ruoprecht kunig zuo Franckreich des egemelten hern Hawgen künig zuo Franckreich sun / herr Conrat hertzog zuo Francken kayser Otten des ersten aidn / Pabst Gregorius d[er] fünft / der für heilig geachtet wirdet des benanten hern Conraten hertzogen zuo Francken sun / vn[d] des bemelten kayser Otten eenckel / her Geyslbrecht hertzog zuo Luttringen des egemelte[n] kayser Otten swager .N. hertzog zuo Luttring hertzog Geyslbrechts sun vn[d] kayser Otten des ersten eenckel / vn[d] vil andre edle vn[d] mechtige geslescht in Teütschen vnd andern landen / Vnd der cristenlich gelaub in teütschen vnd andern landen ist durch die obgemelten kayser künig vnd herzogen ser gemeret worden / vnd vil ertzpischtumb vnd pischtumb klöster vn[d] gotzheüser durch sy gepaut vn[d] gestift / vnd nottürftigclich[2] begabet in manichen landen / Die obbena[n]ten kayser kü[nig] vn[d] hertzoge[n] habe[n] auch vil pebste[n] vn[d] d[er] heylige[n] römischen kirchen groß hilf vn[d] beysta[n]d wider ir veint getan / als dz alles in bewerte[n] annale[n] croniken vn[d] hystorie[n] klerlichen begriffe[n] ist / die bestimbt fraw Rikchart ligt begraben in de[m] closter zuo melkh in d[er] kirchen vorm kor in aine[m] erhebte[n] schöne[n] grab bey hern Lew[polden] herzoge[n] zuo swabe[n] vn[d] marggraf in österreich ire[m] gemahel.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 33. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_33.jpg&oldid=- (Version vom 1.8.2018)
