CHüngund ain schöne wolgestalte fürstin ain tochter hern Lewpolds des tugentreichen hertzogen ze österreich / vnd fraw Helena seiner gemahel / die warde durch iren vater hertzog Lewpolden / v[er]mahelt hern Otacker dem iüngern hertzogen zuo Steir / vn[d] die bestimb fraw Chüngund het nicht kinder mit dem bemelten hertzog Ottacker irem gemahel / vnd starb vor im / vn[d] hertzog Otacker schuoff / das dz herzogtuomb ze Steir irem vater herzog Lewpolden von österreich nach seinem tod volgen solte / das dan also beschahe wan fraw Chüngu[n]d gestorben ist auch ir begrebnuß setzen die Croniken nicht.
REytza ain seüberliche güetige furstin ain tochter aines künigs von Behem / die bstimbt fraw Reytza warde durch iren vater den bemelte[n] künig von Behem verheyrat / hern Heinrichen dem eltern hertzogen vo[n] Medling / ain sun hertzog Heinrichs von österreich gena[n]t Jochsamergot / vn[d] die benant fraw Reytza hette mit herren Heinrichen von medling dem eltern irem gemahel ain ainigen sun / genant heinrich der iünger von medling / vnd fraw Reytza ligt begraben zum heiligen kreütz im Closter im Capitel bey herzog Heinrichen dem eltern irem gemahel.
THeodora ain weyse andechtige fürstin ain müemel hern Alexen kaysers ze kryechen die bestimbt fraw Theodora warde als man zalt nach cristi gepurd M.cc. vnd iij iar durch den bemelten kayser Alexen iren veter verheirat in kriechen / hern Lewpolden dem ernreichen hertzogen ze österreich vnd ze Steir / vnd hertzog Lewpold hette mit der bemelten frawen Theodoren ain fürstliche hochzeit in dar stat Wien / vnd hette mit ir drey sün / Lewpolden das kind / Heinrichen den grausamen / vn[d] Fridrichen den streitpern / von den in der tafel der fürsten gemelt ist / vnd iiij töchter Margrethen Agnesen Constanciam vn[d] Gerdrauten / von den hernach gemelt virdet / kayser Alex fraw Theodoren veter warde vertriben von herr waldwein graff ze Flandern vnd hengaw warde an seiner stat kayser ze kriechen / fraw Theodora ligt begraben zuo Closternewburg im Closter im kor / wan sy gestorben ist vindet man inn der Croniken des Closters lilyenfeld.
MArgreth ain gotzferchtige vernünftige weise fürstin ain tochter herren Lewpolds des ernreichen hertzogs zuo österreich vnd ze Steir / vn[d] fraw Theodoren seiner gemahel die ward durch hern Lewpolden iren vater verheirat als man zalt nach cristi gepurd M.cc. vn[d] xxv iar / hern Heinrichen Römischen künig / ain sun kayser Fridrichs des andern / vn[d] hette ain künigcliche hochzeit in d[er] stat Nüernberg / fraw margreth hette mit künig Heinrichen irem gemahel zwen sün / Fridrichen vnnd Heinrichen / den warde in ir iugent wergeben in puolen durch iren veter Manfredum / vnd als man zalt nach cristi gepurd M.cc. vn[d] liiij iar / warde fraw margreth verheyrat zum anderen mal / durch die landschafft in österreich / hern Otacker marggrafen in merhern vn[d] nachmalen künig zuo Behem / vn[d] hete ain kostliche hochzeit in der stat haimburgk / vn[d] als man zalt nach cristi gepurd M.cc. vnd lxj iar / schiede herr Otacker fraw margrethen sein gemahel von im / vn[d] nam fraw Chüngunde[n] ain tochter Rostislay hertzogen von moskaw / vn[d] als man zalt nach cristi gepurd m.cc. vn[d] lxvij iar ließ künig Otacker fraw margrethen vergeben zuo krembs / vn[d] fraw margreth hette nit kind mit im / vnd ligt begraben zuo lilyenfeld im Closter im
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 42. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_42.jpg&oldid=- (Version vom 1.8.2018)
