vnd ligt da selbs in ainem frawen Closter begraben.
AGnes ain ernreiche züchtige fürstin ain tochter hern herma[n]s herzog ze österreich vn[d] marggrafen zuo baden vn[d] fraw Gerdrauten vo[n] medling seiner gemahel die ward v[er]heirat herzog Vlrichen vo[n] kernden vn[d] hett nit kinder mit im / nach des tod ward sy bezwu[n]gen zuo neme[n] graf Vlrichen von hewnburgk durch künig Ottacker hertzoge[n] zuo österreich mit graff Vlrichen het fraw Agnes sün vn[d] töchter / vo[n] den sind geporen vnd komen graf Vlrich von pfaunperg / her fridrich vo[n] Cili freyher / vn[d] nachmaln graff von Cili vn[d] vil andre mechtige geslecht / wa fraw Agnes begraben ligt setze[n] die Croniken nicht.
MAria ain züchtige gütige fürstin ain tochter hern Roman kü[nigs] vo[n] Reüssen vn[d] fraw gerdraute[n] vo[n] medlin seiner gemahel / fraw maria ward geporn nach abschid ires vaters künig Roman[s] / vn[d] warde durch ir muoter fraw Gerdraute[n] v[er]heirat herzog Steffan vo[n] Agram gelege[n] in windischen landen / herzog Steffan wz künig steffans vo[n] hu[n]gern des fünfte[n] haubtma[n] in der steirmarch Ob fraw maria mit ire[m] gemahel kind[er] gehabt hab oder nit / vn[d] wa sy begrabe[n] ligt setzen die croniken nicht.
GErdraut ain wolgestalte zierliche fürstin ain tochter aines herzogs von Praunsweig die warde durch irn vatter v[er]heyrat anno .M.cc. vn[d] xxvj iar / hertzog Fridrichen von österreich dem streitpern / herzog Fridrich hette mit fraw Gerdrauten ain fürstliche hochzeit in der stat Praunsweig / vn[d] Als man zalt M.cc. vn[d] xxix iar / schiede hertzog Fridrich frawen Gerdrauten sein gemahel vo[n] im mit gunst vn[d] willen seines vatern herzog Lewpolds des ernreichen / vn[d] het nit kinder mit ir fraw gerdraut ligt begrabe[n] zum heilig[n] kreütz im closter im capitel vn[d] fraw Rikhart ir swegerin bey ir.
N Ain seüberliche gerade fürstin ain tochter ains herzogs vo[n] meran im ötschland gelege[n] / die warde durch iren vater vermehelt hertzog Fridrichen von österreich dem streitpern anno M.cc. vn[d] xxix iar / dz doch vnpillich wz freüntschafthalb / auch mit gunst vn[d] willen herzog Lewpolds seines vater / vn[d] anno d[omi]ni M cc vn[d] xliij iar / schied hertzog Fridrich sein ander gemahel fraw .N. ain hertzogin vo[n] meran auch vo[n] im / in gegenwürd bischoff Eberhards von Saltzburg vnd bischoff Rüedigers von Passaw vn[d] het nit kinder mit ir / wan sy gestorben ist auch ir begrebnuß setzen die Croniken nicht.
Gemacht vnd volendet zuouoran got dem almechtigen der lobsamen künigin iunckfrawen Marien / vnd dem heiligen himelfürsten sant Lewpolden vnd seinem geslecht zuo lob vn[d] eren / vnder der regieru[n]g bapst Innocencij des achttisten vnd der allerdurchleüchtigsten vnüberwintlichisten fürsten vn[d] hern hern Fridrichs des dritten Rö[mischen] kaysers vn[d] künigs zuo Hungern / ertzherzog zuo österreich / vn[d] hern Maximilians Römischen vnd zuo Hungern künigs / ertzhertzoge[n] zuo österreich / vn[d] zuo Burgundi vn[d] Britanien ertzherzogen / der benanten kayserlichen maiestet sun / Auch vnder des durchleütigisten fürsten vn[d] hern hern Sigmunds ertzhertzogs zuo öster[reich] vn[d] grafens zuo Tirol / kayserlicher vnd künigklicher maiesteten veter / Auch mit hilff des erwirdigen gaistlichen herren hern Jacobs die zeit Probst / des wirdigen gotzhaus Closternewburg / Als ma[n] zalt nach cristi vnsers lieben herren gepurd .M.cccc. vnd im xci iar.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 44. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_44.jpg&oldid=- (Version vom 1.8.2018)
