New Dresden hat es vmbs Jahr 1618. mit der Befestigung ein solche Gelegenheit gehabt: Sie hatte fünff Pasteyen / mit ihren offnen Streichen / oder Casamaten / fürgelegten Flügeln / vnd Cavalirs; darunder dann die zwo Pasteyen gegen der Elb / hart an dem Wasser / gleichsam an einander gehenckt / die grösseste waren / welche alle / sampt den Wählen / oder Cortinen / von Grund auß mit Pfälen geschlagen / vnnd von dem Rost auß / mit Quaderstucken gemauret / die halbe Höhe der Mawer vmb etwas hineinwarts gehenckt / vnd der Obere halbe theil widerumb Bleyrecht auffgebawet / vnd dann die Brustwehr mit Erden darauff gemacht / mit seinen Scharten / oder Schußlöchern / altem Gebrauch nach / die Cavalirs aber allein von Erden / vnd mit grünen Wasen besetzt / gleichfals mit Brustwehren / vnd Scharten; vnnd die Brustwehren so wol an den Pasteyen / als Cavalirs / inwendig mit Absetzen / oder Staffeln / gemacht gewesen / damit man / neben den Stücken / auch die Handrohr darauff hat brauchen können. Vnd waren die Wäll herumb alle mit fruchtbaren Bäumen besetzt / also / daß allda zuruck kein gewisser stand kunde gemessen / oder beschrieben werden / weil es gerings herumb einem schönen Garten zu vergleichen / vnd allenthalben stand / vnd Platz / genug hatte. Neben obgemelter Pastey / gegen der Elbbrucken / hatte es eine plata forma, herausserwarts in die Elb gelegt / vngefehrlich 16. oder 18. Schuh für die rechte Stattmawer / vnd in die Länge vngefehr / 80. Schuh / jedoch ohne Casamaten / vnd Flügel / welche zu beeden seyten an der geraden Mawer konte auff- vnd abstreichen. Neben derselben plata forma, hatte es ein heimlichen Außfall auff die Elb; daher es scheinte / als ob solche plata forma auff die eine seyten / solchem Außfall zu gutem / gemacht worden / im fall der Noth zu beschirmen. Ob aber solcher Vestungsbaw / bey denen darauff erfolgten Kriegszeiten / seydhero verändert / vnd verbessert worden / vnd welcher gestalt solches beschehen; Davon haben wir keinen Bericht zu geben. Es liegt aber solche Vestung gegen dem Mittag hart an der Elb / gleich wie Vlm an der Thonaw. Obgedachte Bruck allie solle vnder den drey vornehmbsten Steinern in Teutschland die längte gewest seyn. Dann sie acht hundert Schritt lang gewesen / vnd hat 24. Schwibbögen / vnd Joch / gehabt / davon ihr / wegen deß Vestungsbaw / den Hertzog Geörg von Sachsen Anno 1528. angefangen / fünffe abgangen seyn. Anfangs sollen obgedachte Herren vnd Burggraven von Dona / eine hültzerne Bruck allda vber die Elb gemacht haben. Weilen aber dieses Wasser zu vnderschiedlichen mahlen grossen Schaden gethan / so solle die Steinerne / im Jahr 1070. angefangen worden seyn: wiewol theils den Anfang erst ins 1175. vnnd die Vollendung ins 1222. Jahr setzen. Es hat die Vestung / oder New Dresen 3. Thor / das Alt Dresnische / oder Elbthor / da man vber die Brucken nach der alten Statt gehet; das newe Thor / daran Churfürst Christian der Erste zu Roß; vnd das Wildische Thor / vor welchem der Churfürstin Garten. Es ist der Boden / rings vmb die Statt / mit fruchtbaren Aeckern / schönen Lustgärten / allerley Bäumen / vnnd Kräutern / geschmückt. Vnd seyn gemeinlich die Lustgärten mit allerley fruchtbringenden Hecken / welche mit kunstreichen Händen durch eingeflochten / vmbzogen. Es seyn allhie zu sehen I. von Kirchen / die Heilige Creutzkirchen / so Anno 1229. gebawen seyn solle; vnnd da sie Anno 1491. verbronnen / im Jahr 1499. wider auffgerichtet worden. Anno 1583. ist der starcke Thurn daran höher geführt / vnd mit 3. Spitzen vermehret worden. Neben dem Altar / seyn / zur Rechten / der Churfürsten Augusti, vnd Christiani, Bildnussen auff Taffeln gemahlet; wie auch gegen vber deß Churfürst Moritzen / hinder welchem der Tode / der in der Rechten einen Fäustling / oder Puffer / ihme in den Rucken helt; in der andern aber ein Stundglaß hat / zu sehen. Auff besagtem breyten starcken Thurn an dieser Kirch / stehen 4. Stuck Geschütz / vnd vnder denen eins / so von Grimmenstein / oder Gotha / kommen / darauff Hertzog Johann Friederichs von Sachsen / Churfürstens /
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 98. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_098.jpg&oldid=- (Version vom 1.8.2018)
_098.jpg&oldid=-){kind=link}
_098.jpg&oldid=3393425){kind=link}