ihn die Vnsrigen wider verlassen müssen. Vnnd wurden zwo Schildwachten nahe bey dem Fußläger weggenommen / wie auch den 6. ein Corporal vnnd 2. Botten vom General Stahlhans hineinbracht. Beyde Lauffbrücken musten wegen deß grossen Wassers auffgenommen werden / welche deß dritten Tages hernach wider gebawet worden. Den 7. berichtete ein Vberläuffer von den Belägerten / daß der Corporal vnd beyde Botten mit gebracht / Stahlhans wolle sie inner dreyen Tagen entsetzen. Den 8. ward auff die Verbawung in der Keys. Preß mit Stücken gespielet. Den 9. hat man deß Abends wider vier Fewerkugeln eingeworfen. Den 10. ward ein Thurn von 4. Batterien beschossen / vnd nebenst dem Gange so ruiniret / daß er die Helffte von oben herab eingefallen. Hierauff hat man gestürmet / vnnd ob zwar die Belägerte den Thurn angezündet / daß die Vnserige wider weichen müssen / dabey der Churfürstl. Ingenieur vnd Hauptmann von Arnheimb nebenst einem Lieut. sehr beschädiget worden / so hat man ihn doch deß Abends erobert / vnd hernachmahls etliche Böden / in / vnnd einen viereckichten Kasten auff den Thurn gebawet. Hierbey sind 18. Knechte / theils beschädiget vnnd theils todt blieben. Den 11. sind in 2. Außfällen 1. Corporal / vnnd vier Knecht / von Sächsis. vnd 4. Knecht von Keys. hinein gefangen vnd 2. beschädiget worden. Den 12. 13. ist nichts passiret/ als daß eine Mine ersäufft worden. Den 14. ward eine Mine gesprenget / welche nicht allerdings recht effectuiret. Den 15. hat man gegen Abend / als die Sonne gleich vntergangen / vnd gantz keine Wolcken waren / gesehen / wie eine Fewerkugel vom Himmel gefallen / ließ hinter sich einen fewrigen langen Strahl / so sich alsobald in eine weisse Wolcke gleich einer Schlangen-Linie verwandelt / eine gute weile hernach gab es 2. starcke Knalle / gleich als es in der Ferne gedonnert / oder man 2. grobe Stück gelöset hätte. Den 16. vnd 17. ward der Thurn am Reichenbacher Thor beschossen / vnnd 1. Sächsischer Hauptmann nebenst 1. Capitayn Lieutenant beschädiget. Den 17. kam ein Trommelschläger mit Schreiben an Ihr. Churfürstl. Durchl. von der Land- vnd Bürgerschafft herauß / berichtete / daß der Commendant accordiren wolte. Fielen aber gleichwol vnd zwar zum letzten mahl herauß / nahmen die Reduite bey der Kirchen (8.) ein / bekamen 8. Gefangene / zween Officirer von den Keyseris. blieben / sechs Knecht wurden beschädiget. Den 18. ward der Obrist. Wachtmeister Bischoffsheim vnd Hauptmann Falckenberg hinein / vnd dargegen der Obrist Wachtmeister Bock vnd Hauptmann Müller herauß geschickt / mit welchen man tractiret, vnnd etzliche Puncta, worauff er abziehen solte / mit hinein gegeben / es hat aber der Commendant solche nicht eingehen wollen / sondern andere Puncta den 19. herauß geschickt / welche Ime auch / vnnd zwar damit die Statt desto eher liberiret würde / mehrentheils eingegangen / vnnd den 21. von beyden Theilen vollnzogen worden / worauff den 23. Septembris der Abzug erfolget. Vnd also ist diese harte Belägerung / welche 10. Wochen gewähret / durch Hülffe deß Allerhöchsten glücklich geendiget / diese fürnehme Statt vnnd viel hundert vnschuldige Seelen / die sonst / wann das Fewer angangen / verderben müssen / vor dem gäntzlichen Ruin vnnd Vntergange erhalten / vnd widerumb in Ihrer Churf. Durchl. zu Sachsen / etc. als ihres Erbherrn Macht vnd Gewalt kommen vff benandten 23. Septemb. An. 1641.
- A Graben vnnd Wall innerhalb der Statt.
- B Mühle jenseit dem Wasser.
- C Mühle disseit dem Wasser.
- D Das Reichenbacher Thor.
- 1. Kirche im Kloster.
- 2. Hospital S. Jacob.
- 3. Das Saltzhauß.
- 4. S. Nicol. Kirche.
- 5. Rundel am Wasser.
- 6. Neißthor.
- 7. Kirche S. Petri vnd Pauli.
- 8. Nonnen Kirche.
- 9. Thurn am Frawenthore.
- 10. Das Frawenthor.
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 178. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_178.jpg&oldid=- (Version vom 1.8.2018)
_178.jpg&oldid=-){kind=link}
_178.jpg&oldid=3393479){kind=link}