von Trenbach / von welchem oben / vnnd der ins gemein für den 70. Bischoff zu Lorch vnd Passaw gehalten wirdt. 4. Herr Leopoldus ErtzHertzog zu Oesterreich / der An. 1608. gedachtem Bischoff Urbano, wegen seines hohen Alters / erstlich zu einem Coadjutore zugeben worden / vnnd 5. Herr Leopoldus Wilhelmus, ErtzHertzog zu Oesterreich / dessen Hochfürstl. Durchl. solches Stifft noch verwaltet. Besiehe hievon zum Theil Marcum Velserum libr. 5. rerum. Boicarum; insonderheit aber Wiguleum Hund / in Metropoli Salisburgensi, tom. 1. folio 285. seqq. vnd was Christophorus Gewoldus darzu verzeichnet hat.
Es schreibet Raderus, volum. 1. Bavariae Sanctae, daß Käyser Heinrich der Ander / deß Heyligen Maximiliani, fast bey 20. Jahren gewesten Bischoffs zu Lorch / oder Ens / der vmbs Jahr 284. florirt hat / Cörper / hieher auff Passaw / von Ens / gebracht habe. Sonsten ligt im Dom allda S. Valentinus , der vmbs Jahr Christi 400. allhie / wider die Arianer / wiewol vergebens / gelehrt hat. Nach seinem Todt / ist er / entweder vom Bäyerischen Hertzog Thessel; oder von S. Corbiniano, auß Tyrol / hieher gebracht worden. Es ist dieses Stiffts Reichs Anschlag Monatlich 18. zu Roß / 78. zu Fuß / oder 528. fl. vnnd zum CammerGericht Jährlich 58. fl. 21. Kr. 3. Heller / wie ich gefunden / vorhin gewest; vnd vielleicht noch: Das alte CammerDeputat aber war / vor der gemeldten Erhöhung 35. fl.
Ist eine Statt in OberBäyern / an der Ilm / auff dem Weg von Mönchen nach Ingolstatt / zwischen Hohen-Camer / vnd Reichertzhofen / gelegen / vnd in die Fürstliche Regierung Mönchen gehörig. Hat ein LandGericht / darinnen auch die Märckte Hohenwart / vnnd Geisenfeld / 4. Clöster / 9. Schlösser. 3. Adel. Sitz / 19. Hoffmarchen / sampt etlichen Dörffern / vnd andern Gütern / gelegen. Ward in dem Bäyrischen einheimbischen Krieg Anno 1397. von Hertzog Ludwigen zu Ingolstatt eingenommen / wie beym Aventino zu lesen.
Anno 1646. ward dieses Pfaffenhoffen 6. Stund lang / von den Schwedischen / außgeplündert. Anno 48. ward diese Statt / von den verbundenen Völckern / abermals eingenommen.
Am Nordgöw / wo vor Zeiten die so genante Narisci gewohnt haben / ein halbe Meil von Nabburg an der Nab gelegen / darein da das Wässerlein Pfreimbd / so beym Böhmer Wald entspringt / fället. Es gehört dieses klein / vnnd schlecht erbawtes Stättlein / sampt dem schönen Schloß / gleichen Nahmens / ausser deß Stättleins gelegen / vnnd das zugehörige Ampt / den Herren Landgraffen von Leuchtenberg / vnd ist Bäyrisch (vorhin Pfältzisch) Lehen / wie Wiguleus Hund im andern Theil deß Bäyrischen Stammenbuchs saget / vnd daß ihr / der Herrn Landgraffen Stammenhauß / Schloß vnd LandGericht Leuchtenberg / vor dem Böhmischen Wald / vnnd in dieser Gegendt gelegen / ein Lehen vom Reich: Wernberg / Schloß vnnd Herrschafft / Böhmisch Lehen; aber das Halßgericht Pfältzisch / (jetzt Bäyerisch): vnnd dann Gruenßfeld / Schloß / Statt vnd Ampt / im Land zu Francken / (davon in selbiger LandsBeschreibung) Würtzburgisch Lehen seye. Besiehe von dem besagten Schloß Leuchtenberg / vnd LandGericht / so man jetzt ein Ampt nennet / auch den Authorem deß Discurs von den ReichsVogtheyen / Anno 1639. in 4. außgangen / am 47. Blat.
Es haben die H. Landgraffen von Leuchtenberg / so nunmehr abgestorben / vorhin / zum Reich / monatlisch 6. zu Roß / vnd 14. zu Fuß / oder an Gelt 128. Gulden; vnnd zum Cammergericht / dem erhöchten Anschlag nach / järlich 83. fl. 21. Kr. 3. Heller / den Thaler zu 69. Kreuzer gerait / wie ich gefunden / contribuirt. Der Zeit schreiben der Herr Churfürst / vnd die Hertzogen aus Bäyern / sich auch Landgrafen zu Leuchtenberg; vnd ist / bey dem nächsten Reichstag zu Regenspurg / in den Jaren 53. vnd 54. die Verwittibte Fr. Churfürstin / Fr. Maria Anna / in Ober / vnnd NiederBäyern / auch der ObernPfalz
Matthäus Merian: Topographia Bavariae. Frankfurter Kunstverein, Frankfurt am Mayn 1644, Seite 66. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Bavariae_(Merian)_121.jpg&oldid=- (Version vom 20.11.2016)
_121.jpg&oldid=-){kind=link}
_121.jpg&oldid=2955009){kind=link}