|
Ferdinand III., Kristina von Schweden : Westfälischer Friede - Vertrag von Osnabrück |
|
|
[Art. XIV, 3] Vber das ist beliebet/ daß nach Abgang deß Herrn Marggraffen/ von wegen vnd im Namen der nicht erfolgten Vnderhaltsk/ seinen Erben vnd Nachkommen erlaubt seyn solle/ besagtes Closter vnd Aempter vff fünff Jahr zu behalten/ vnd mit allen jhren Zugehörungen vnd Gerechtigkeiten/ ohne davon Antwort oder Rechenschafft zu geben/ zu nutzen vnd zu niessen. Nach verfliessung aber der fünff Jahren/ sollen ermelte Aempter/ vnd derselben Gerechtsame/ Gefälle vnd Renten/ dem Ertzstifft ohne Verwaigerung wider abgetretten/ vnnd von obgedachter Summ ferrners nichts geandet oder gesucht werden.
Vnd darbey solle es auch verbleiben/ ob gleich das Ertzstifft Magdenburg zu einer gleichmessigen Ersetzung an den Herrn Churfürsten zu Brandenburg/ dessen Erben vnd Nachfolger/ gelangen wird.
[Art. XV, 1] Hessen Casselische sach ist verglichen. Betreffent die Hessen Casselische Sache/ ist verglichen worden/ wie folgt:
Für allen Dingen solle daß Fürstliche Hauß Hessen Cassel/ vnnd alle dessen Fürsten/ fürnemblich Fraw Emylia Elisabetha/ Landtgräffin zu Hessen/ vnd dero Sohn/ Herr Wilhelm/ wie auch jhre Erben/ Diener/ Bediente/ Lehenleuthe/ Vnderthanen/ Soldaten/ vnd alle andere Angehörige/ keiner außgeschlossen/ ohnerachtet denen entgegenstehenden Verträgen/ Processen/ Aacht: vnd anderen Erklärungen/ Vrtheilen/ Executionen vnd Transactionen, welches alles/ wie auch die Ansprüch vnd Anmassungen wegen Schadens vnd Schmach/ so wol in neutral, als Feindtsstandt/ hiemit gäntzlich vffgehoben/ der allgemeinen obbeschlossenen/ vnd vff den Anfang deß Böhmischen Kriegs/ nebenl völliger Restitution der widerbrachter Amnestia, (außgenommen der Röm. Kayserl. Mayestet/ vnd Hauses Oesterreich Vasallen vnnd Erblichen Vnderthanen/ massen von solchen im §. Tandem omnes, etc. disponirt) auch aller auß diesem/ vnd dem ReligionFrieden herkommenden Wolthaten/ gleichmessiges mit andern Ständen Rechts/ (massen in dem Articul/ so also anfangt: Vnanimi, etc. verordnet) vollkommentlich geniessen/ vnd theilhafftig seyn.
[Art. XV, 2] Abtey Hirschfeldt. Fürs Ander / solle das Hauß Hessen Cassel/ vnd dessen Nachfolger/ die Abtey zu Hirschfeldt mit allen jhre Zugehörungen/ Welt- vnd Geistlichen/ in: oder ausserhalb Landts (als die Probstey Gellingen) gelegenen/ (jedoch vorbehaltlich der Rechten/ so das Hauß Sachsen von vndencklichen Jahren possidirt) behalten. Vnd deßwegen bey
Ferdinand III., Gustav Adolf: Westfälischer Friede - Vertrag von Osnabrück. Frankfurt: Philipp Jacob Fischer, 1649, Seite 72. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Westfaelischer_Friede_IPO_1649_072.jpg&oldid=- (Version vom 29.5.2018)
