Witlic si allen luden, de dessen breff zullen seyn ofte horen lesen, dat ic Zyverd Veckinchus bekenne unde vorlye in dessen breve, dat dat virdepart van den dren husen int Corte Ghenthof staende up den hoke bi sunte Gillis brucghe, dat up my ghescreven steit unde ghekoft waren van Ioriis van Rüsele, dat sulve virdepart van den vorscreven dren husen tobehoret Johans van den Broke, Hinric Rathuse unde erer selschap, unde daran so en hebbe ic neynerleyepart noch deel. Unde belove ok vor my unde vor myne erfnamen, dat ic up dat vorscreven virdepart van den vornomden husen nicht en sal soken noch anspreken in tocomenden tiiden sunder arghelist. Unde des to eynen tughe der wareit so hebbe ic Zyvert Veckinchus vorscreven myn inghezeghel ghehanghen vor dessen breff, int jar uns Heeren 1395 upten lesten dach in augusto.
3. Series Veckinchusen und Kurt Visch in Riga an Hildebrand Veckinchusen in Brügge. – 1398 Juli 1.
- Rev. St.-A. Orig. in 2 gleichlautenden Exemplaren.
- Das eine Exemplar trägt unter der Unterschrift der Briefschreiber folgende Bemerkung von H. Veckinchusen’s Hand: Ick Hildebrant Veckinchusen do kunt allen denghenen, dey dessen breyf seyn, also van den 100 marc Ryghes, er dat ick to ennyngen dingen volbort gheven wolde, so solden dey 100 marc to mynem wyllen sin, nicht to myns heren; dat wyllen dat wort my toghezeghet unde ok ander dinch, dat syck wol vinden sal, es ok alle sake vollentoghen na utwysinge desses breyves, dat wyl syck ok wol vinden also et tyt ghevet. Ick Hildebrant Veckinchhusen hebbe desse 4 ryghen hirop screven.
- Adr.: An Hildebrand Veckinchuosen to Brugge haec littera detur.
Vruntlike grote vorgescreven unde wes wy gudes vormoghen. Hildebrant hir es een erbar borgher, de heid Engelbrecht Witte, de wolde sich gherne met uns bevruonden, de hevet ene suoverlike juncvrouwe to ener dochter van 15 jaren, de wolde he dy gheven gherne to der ee, es et gode beheghelik. Des hebbe wy wol worde met em gehad unde hebben en ghedeghedinghet to dyner beheghelicheid, dat he di wel gheven met syner dochter 200 ℔ gr. unde kost unde cleder. Unde wes eme vorder bord to donde an cleynoden unde an ingedome als men ener juncvrouwen pleghed mede to ghevende, dat wel hey er vullenkomeliken mede gheven. Unde uns duncked, dat dit gude weghe sin unde bidden dy, dat du dit ghoutliken tho dy nemest unde wes dy de hilge gheest anwiset, dat dy nuotte duncket an seile unde an lyve, darvan gheef en ghoutlik antworde sinen gesellen Johannes Holsten unde Wolter Roden unde wy en weten in dessem lande neyne beter weghe to desser tyd.
Unde ok heved uns geseghed Enghelbrecht vorscreven, dat der juncvrouwen siner dochter sin ghegheven 100 mark, de sin er ghegeven to spelpeninghe, de en sin nicht gerekent in de vorscreven summen unde de vader wel von
Briefwechsel Hildebrand Veckinchusen, Seite 2. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_002.jpg&oldid=- (Version vom 18.8.2016)
