besten raden und helppen, dat gy, ef Got wel, gude lude mogen werden, op dat gy wol wellen und doen na unsen rade und nemen juowes dynges war.
Item Hans nem neynen homot an und doe mynem broder to wyllen und scryf my al tydynge und boschet weder, wat du koft hevest met den 350 gulden und oftet al wol overkomen sy und lere scryven und al ander dync, dat dy to gude komen mach und maket also dat du guden loven met den luden krygen mogest und holt alle manne, dat duo en lovest und betale wol, dat sal dy op dey lengede to gude komen und scryf dynen brodern altydynge in Prusen in Lyflande, op dat sey dar wat by leren und sende en somals jo eyn cleyne allerleye prunselynge und dat sey dy altyt weder scryven, wat dar best sand sy. Grote alle vrunt. Ghescreven op sunte Peters avent in der arnen 1410 jar.
Hans ic hebbe desse scryft darumme an mynen broder aldus open sand darumme op dat hey dy alles dynges met den munde berychten, op dat du aldync bet vorstaest und op eynen guden vasten voet mogen setten und dat my myn broder eyn vast antworde weder scryve met den eyrsten. Darumme tuo dar neyn dync in und maket also dat et al umme vaste stae. Got geve beholden vard al umme. Vard to Gode ward; ic doe ju darumme also grot vordel und hebbe also groten wyllen to ju umme des wyllen gy syn junge lude und wolde Got helppen und vrunt, dat gy gude lude mochten werden, so hopede ic gy solen unsen kyndern des gheneyten laten. Men wyste ic, dat gy doen wolden also nu vele junger lude doen, wan sey icht bet mogen, so vorgeten sey al der genen, dey en hulppen und god daen hebben, so were my leyt …[1] gy ju also vele hulppen hadde also ic und myn broder alreyde daen hebben, ic hope gy solen wol doen lyk also ic ju betruowe. Got geve met leyve to leven in ewycheyt amen.
33. Sivert Veckinchusen in Köln an Hildebrand Veckinchusen in Brügge. – 1410 Aug. 1.
- Rev. St.-A. Orig. Adr.: An Hyldebrand Veckynchusen Brugge littera detur. Es macht den Eindruck als ob der Anfang fehlt, der vielleicht auf einem anderen Blatte stand.
Item also gy scryven van deme gelde by Hans van Mynden, dat nemet op also gy eyrst kunnen und also ic ju erscreven hebbe und bewerd her Hynric Scryver ummer dey 275 marc Lub. also gy eyrst und best kunnen und sendet eme dey; ic hadde Hans van Mynden van Vrancvord sand 5 balle sardoke, dat hey dey umme reyde gelt vorkopen solde und betalen myne schult. Nu hevet hey dey to borge vorkoft op unser andern vrowen dach, darumme kopet dat gelt op ene und nemet den dach also gy lengest kunnen al schadet my dat eyn cleyne, dat moet overseyn syn, ok des ghelyk nemet dey 330 marc Lub. op Hynric Losekynge und ok den dach also gy lengest kunnen, wand my sal ummer vele geldes inkomen van gude und schulden
- ↑ 2 Löcher im Papier.
Briefwechsel Hildebrand Veckinchusen, Seite 42. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_042.jpg&oldid=- (Version vom 31.7.2018)
