vor unser leyven vrowen dage der besten. My duncket al truowe in der werlt es ute, dat bevynde ic eyn del bynnen Lubeke wol met vele saken. Got betert al umme. Dey sydenwerckerscap syn my mer dan 1200 marc Lub. Got unbarmet, dat ic gy an dey sydenwerckerscap komen sy, dat sol my vele schaden, ic wolde dat ic dat gelt op 500 marc na al in hedde.
Item ic scref Boden umme dat gelt op sunte Johannes dach, dat wel hey Johan van der Bruoggen geven, dat nemet ok op wan gy wellen und hey scryvet, dat hey van der schulden nicht mer den 100 und 20 marc an Sundeschem gelde inmaent hebbe und hey welle umme dat ander teyn und manen also hey best kan, ic wel eme scryven darna hey dat inmanen kan, darna sal hey dat Hans van Mynden geven und ju overscryven und ic scref eme ok van synem pard (!) selscap, dat blyvet staende also dat vorstond und hey welt nicht anders maken. Item so hevet Hans van Mynden vor dey 30 ℔ gr. utgeven dey Tydeke Swartte ut Prusen overkofte vor elk marc Prusch 35 sl. Lub. summa van den 30 ℔ gr. 223 marc 3½ sl. Lub. Aldus moge gy dyt scryven bey dey rekenscap.
Item juowen breyf ghescreven des sundages na sunte Johannes dage[1] und hope Tydeke Swartte sy nu wol by ju und ok dey 2 tunnen werx van Gotlande. Scryvet my al tydynge darvan, ic hebbe Clawes Swartten lange screven al myn gudduncken, ic wel ju bynnen kord wol mer von den Lubeschen saken scryven, wand ic hebbe mynen knecht to Lubeke und Lunenborch sand umme al tydynge van vele saken und ic lat Lyseke wellen, ef Got wel, bynnen 12 dagen efte er in eyn hus varn, Got geve to guder tyt; inghedoeme sal my vele geldes kosten, ic moet hyr 50 ℔ gr. hebben, sal ic al dync hyr utreyden, darumme vorduopet ju nicht in schulden to hoge dat wel ovele staen by der see und men seget hyr dar sy eyn schep nomen, dat nu lest to Lyflande ward segelde, Got geve dat Zergys und de Tomaschen laken dar nicht inne syn.
Item ic sende ju dey kopye van den breyve, also myne borgerscap opseget ward. Ic meyne, dat steyt wol ghenoch mach my dat helppen, ic wel an den byschop senden umme eyne kopye under synen inghesegele, es dat sey my myn gud nemen, so mot my dat mer kosten, Got gevet beter. Item grotet Gobelen van deme Sternen vruntlyken van myner wegen, ic hebbe syner vroven screven mynen wyllen und latet herward komen, ic wolde dat et alreyde hyr were, dancket eme vruntlyken. Item umme mester Gerlach, dat es gud, dat gy eme vruntscap doen, men ic vruochte dat sole nicht vele inbrengen, men moet vele doen umme beters wyllen, Got geve der sake eynen guden eynde al umme. Tut Hynric opme Orde to Lubeke ward, so salt eme varlyc noch syn, doch ic meyne sey sollen nicht gerne alsolke borgern[WS 1] unbern, doch eme es noet gude vaste vorworde ic wel to Lubeke nicht nochtan scryvent my som vrunde to male hartlyken, dat ic darummer weder komen sole und sole hern und ander vrunde bydden, dat sey my vor my scryven, dat ic dey borgerscap weder krygen mochte; ic wel nicht vleyn, er men
- ↑ 29. Juni; scheinen einige Worte ausgelassen, etwa „hebbe ik wol verstan“ oder ähnliches.
Anmerkungen (Wikisource)
- ↑ Korrigiert nach Berichtigungen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 43. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_043.jpg&oldid=- (Version vom 31.7.2018)
