bet op desse tyt. Item also gy scryven van den 18 marc Pruosch, scryvet my warvan dey in myn rekenscop komen syn, wand ic wet des ummer nicht; al ander sake van unser rekenscop late ic staen to guder rekenscop und wel ef Got ok to Vrancvord ward bynnen kord und darna wel ic ju al antworde scryven und dat sal, ef Got wel, also gud werden met allen dyngen dat wy, ef Got wel, unses dynges wol eyns solen blyven. Ic wel al dat doen, dat gy wellen und vele mer dan gy meynen, ic meyne al dync gud. Got geve dat aldync to den besten vallen mot to ewycheyt amen.
Ic hebbet op neyn arch ghelaten, dat ic ju nicht lange volget hebbe met der rekenscop. Ic was des nicht vroet und sy des noch nicht al vrot, ic wolde wol dat al dync lange slecht wesen hedde und heddet ummer also gerne slecht, also gy met allen dyngen hedde dat unlucke to Lubeke daen, so were desser sake und vele ander sake neyn noet. Item also gy scryven van der Venedyesschen selscop, dat gy dat juwe darut hebben wellen nach scheyn, dey rekenscop sal wol scheyn in der vasten, ic hope dey rekenscop sole also wol vallen, dat wy dat unse dar al umme gerne inholden solen und hedde wy mer geldes wy solden dar gerne mer inleggen, Got geve beholden vard al umme.
Item also gy my screven hebben van unser veddern Tomas, Got geve, dat et gud werde, so est my leyf, ic meyne dat sole anders vallen in Lyflande des ic vruochte; jo dat unse vrunde bet voren jo my leyver were, dey lop der werldes gemelyc nu aldus.
Also Got vorsey unse beste to ewycheyt. Item ic scref ju by Balken umme syden wat ju daran gud duncket, dat doet, men ic meyne dar sole neyn schade ane wesen, est dat gy neyn syden kopen to unser behef, so kopet umme in dey selscop 200 punt und sendet over sunder suomen.
Item umme Lubeke, dar wel ic nicht weder henne dencken bynnen 2 jarn, men gy mogen dar wol in wan gy wellen; ic woldet wol bestellen met deme olden rade, dat gy dar wol weder in mochten teyn sunder er begryp, men ic wet nicht wat nutte wesen wel, ic wel ju na der myssen wol myn gudduncken scryven, sey meynen op sunte Eygydyus dach[1] solen dey korvorsten to Vrancvord syn umme eynen nyen konync, Got geve eynen guden konync und voge al dync to den besten al umme.
Item Lyseke es to unser leyven vrowen to den eynsedelygen togen bynnen 3 dagen, Got geve, dant wy des alle betert werden. Grotet myn suster und ju dochter Drudeken und al vrunt, ic hebbe dey 7 gulden wol untfangen, ok meyne ic Balke sole my ok wol betalen. Item my es leyt, dat gy also vele tachter syn op unse selscop, ok solde Hynrik Tüte dey rentte ut der selscop betalt hebben alle jar, dat hadde ic eme ok allewege screven na deme dat dat gelt in der selscop es, so werd ok mogelyc dey reyntte ut der selscop to nemen. Ic kan des nicht wol vrot werden, woe unse selscop steyt, es unse selscop tachter in beholdener reyse, dat es tomale gemelyc, my hevet lange na der selscop vorlanget to weten dey legenheyt darvan sey mach ummer nicht tachter syn also ic hope, Got geve beholden vard al
- ↑ 1. Septbr.
: Briefwechsel Hildebrand Veckinchusen. Leipzig: S. Hirzel, 1921, Seite 48. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_048.jpg&oldid=- (Version vom 31.7.2018)
