und ic sende ju Johannes rekenscap van Mynden weder. Doet wol und slaet an den 864 marc 12 sl. af, wat darvan afbord aftoslaene. Ic meyne, gy vynden al dync wol, ic sande ju lest juwe rekenscap weder, dar gy my inne scriven warvan dey 800 marc und 64 marc 12 sl. wern. Wan ic dat wyste, so wolde ic dat hyr wol slychten.
Item my duncket gy hebben dey 24 marc Pruosch in dey rekenscap nicht screven und ok also gy scryven van 9 ℔ gr. ic hebbe uns men rekent men 18 ℔ gr., dy Hoesteyne gaf, ic rekende uns der 9 ℔ gr. nicht, dey ic eme van Swartten wegen also dath, kunnen gy des underwysen, so moet ic dat weder utgeven. Gy vynden aldync clar in myner rekenscap. Hans van Mynden hevet my ok rekent vor den naten terlync wandes to ungelde 3 marc Lub., dey sy ic ok tachter, est dat gy dyt al nicht slechten kunnen, so scryvet my ofte ju ergen icht an schelt und scryvet my, warvan dey 864 marc 12 sl., so wel ic dat wol slechten. Dyt moge gy wol vor arch nemen, dat ic ju also vele moge, doch so hedde ic gerne eyn vast eynde, darna wolde wy al dync al older rekenscap slechten und den eynde in unse boke scriven und darna vord des besten ramen. Item ic hebbe to Lubeke an schult an den sydenwerckers by 400 marc, dey sal Johan van der Bruoggen inmanen to Tomas Veckynchusen behof, deme hebbe ic dat toscryven laten und hope dat sole mest vor sunte Johannes dage inkomen.
Item dey 100 synttener wasses hebbe ic Arnd Wachendorppe half laten to wynne und vorluse, dat quam also to: ic solde borgen setten vor dat was und hadde seget, wan Slyper to hus queme, dey solde vor my besegelen und loven, des en wolde Slyper umme neyn dync doen und dar ic umme in also groten noten was, des ic ju nu mer to vullen clagen kan und hedde gerne 50 gulden darumme geven dat ic dat was ny koft hedde, also danckede ic Gode, dat Arnd dat was half staen wolde und mede besegelde; darumme doet dat beste darby und nemet dyt int beste und vorkopet wan ju best tyt duncket und kopet guden kop laken mede und holdet dey rekenscap van den 100 synttener wasses und ok van 15 stucken bysunder elk dat syne und ic sende ju by scheper Doenewolde dey 15 stucke alsdus 
, und 4 stucke 
, und drei stro aldus 
, in den 3 stro syn in eynen stro syn 12 cleyne stucke und in eynen 10 stucke und in eynen 5 stucke. Dey schepper sal van den 19 stucken hebben van elken stucke 2 gulden myn 1 ord, van den 3 stro 6 gulden und hebbe eme hyr neyn gelt geven, betalt ene dar. Item gy screven my lest van gelde, dat gy meynden dat ic manc gelde hedde, dat ju Hans van Mynden sand hadde, dar scryvet my noch beschet van und ic moet umme der vencknisse wyllen van Slyper und ok umme Peter Karbowen wyllen to Francvord und wet nicht, woe drade ic wederkome. Darumme slechtet gy al dync, ic hebbe in myn bok screven, dat ic al dync met ju slecht rekent hebbe op juwe rekenscap und hebbe myn ghebrek darby screven altyt op gude rekenscap. Wan gy my den eynde scryven, so wel ic dan al dync clar scryven op eyn eynde. Grotet alle vrunt. Ghescreven 4 dage na der hyllegen 3 konynge dage 1411 jar.
Briefwechsel Hildebrand Veckinchusen, Seite 63. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_063.jpg&oldid=- (Version vom 31.7.2018)
