|
Wilhelm Stieda (Hrsg.): Briefwechsel Hildebrand Veckinchusen |
|
|
dar bydde ju umme. Des es noet umme doetlyke wyllen und scryvet my met den eyrsten eynen vasten eynde und latet uns al rekenscop und al breyve doeden und tonichte maken und eyn nye vast dync und selscop maken und ic love, dat ic myn levedage hyr blyven welle, doch dat mochte bynnen 1 jare vele anders werden to Lubeke und ok op ander eynde und ramet in allen dyngen des besten also wel ic ok doen. Und scryvet my, woet met Zergys Veckynchusen und met Woesten und met al unsen jungen ghesellen geyt und doet des besten na Hoensteyns breyven und scryvet my altyt beschet van unser selscop und helppet des besten ramen. Und ic wel Hoensteyns noch 1 jar ofte 2 staende holden in den namen Godes. Bestellet gy al dync to Prusen und Lyflande ward und beslaet ju nicht to hoge in schult, er wy unses dynges eyn eynde hebben. Gy hadden Tomasche laken to Lubeke sand, dey bate sal cleyne vallen und lancsam gelt und dey lude hebben al sulven noch to doene met eren egen dyngen.
Item spreket met unseme oeme Woesten umme den hof, dey hyr in Westfalen es, dat my dey mochte oplaten werden, so wolde ic ene wol an unsen vrunden bestaden den des wol noet were und ic hebbe Woesten dar erumme screven, est dat hey my den hof nicht oplet, so est suone, hey werd eme und den synen nummer to nutte, wantte hey es alreyde in alsolken handen, dar hey lancsam utkomet und solde ic ene ut den handen krygen, dat solde my noch mer den 20 gulden kosten. Eyn antworde begere ic van al und grotet myn suster und alle vrunt. Ghescreven 8 dage na pynxsten 1412 jar.
Ic blyve noch wol 14 dage op dat lengeste to hus, darumme scryvet my al dync, ic hebbe dyt al met hast screven, aldync sal sunder begrype syn. Sendet my dessen breyf und ju gudduncken weder.
77. Sivert Veckinchusen in Augsburg an Hildebrand Veckinchusen in Brügge. – 1412 Juli 13.
- Rev. St.-A. Orig. ohne Adresse, als Einlage in einem Briefe desselben an denselben v. 22. Juli aus Augsburg.
Vruntlyke grote vorscreven leyve broder. Ic hebben to Lubeke screven, dat sey ju 700 marc Lub. an gude und gelde senden solen, dey ic in der selscop bysunder hadde, dey Hans van Mynden vor my inlecht hadde. Scryvet gy Tydemanne ok darumme, dat dey selscop my dey 700 marc ut der selscop nemen late und nemet dat to ju and ic mot to Kolnne und in dey mysse to Francvord gelt hebben, myn schult mede to betalen. Dey selscop es my schuldych van leynden gelde 500 gulden, mer dat kan my ok nicht werden, darumme helppet my dey selscop seggen my dat gy vele gudes van der selscop wegen underhebben, dar moge gy my myn gelt wol van geven, darumme helppet my also gy best kunnen und eyrst kunnen. Konde gy Lyseken met 300 gulden helppen, dat sege ic gernne und doet dat beste in allen dyngen und wy wellen hyr dat beste
: Briefwechsel Hildebrand Veckinchusen. Leipzig: S. Hirzel, 1921, Seite 18. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_089.jpg&oldid=- (Version vom 31.7.2018)
