|
Wilhelm Stieda (Hrsg.): Briefwechsel Hildebrand Veckinchusen |
|
|
summe es bey 370 gulden und Tydeke Swartte und Losekync screven my beyde umme dey sardoke, ic hedder anders nicht koft, an dessen 2 summen gulden leget my grot macht 800 gulden vor was und 370 gulden, summe 1170 gulden. Ic kunder nummer al opnemen noch met eren betalen, quemet my nicht van Brugge in dey mysse und dat mot betalt syn, sal ic by eren blyven.
Helppet my Got ut desser schuolt, ic kome nummer in also grote schult, ic wete dan mer hulppe dartegen und wel, ef Got wel, ut der schult alsolde ic nicht 1 ₰ in selscop noch an kopenscap noch in cleynode beholden, dar bydde ic ju, dat gy my to helppen, darna mach my God vordan helppen, dat ic wat weder in handen kryge van schult und selschop und vrunden, dar ic weder by nerynge mede kome. Und queme ic ut deme loven, so kunde ic nummer weder by nerynge komen, woe ic nu loven holden kunde, so solde my met der hulppe Godes nicht schelen. Hyr leget my dye und vorderf ane, darumme helppet my nu, ic hope wan ic dat myne van al umme weder by eynbrenge, so welle ic noch wol by nerynge und bestaende blyven boven dey 1170 gulden. Sy ic van myner egen wegen wol schuldych by 600 gulden, dey moet ic ok hebben, ic hadde in der selscop by 1300 marc Lub. bysunder, dey met Hans van Mynden in dey selscop quemen, dar hope ic dat my by der helfte vor weder werden sal. Und dey selscop es my schuldych, dat ic utleynt hebbe 2 jar lanc by 600 gulden; kunden my dey ok weder werden, so mocht ic ut der schuolt komen und al dync solde, ef Got wel, beter werden. Nemet dyt nicht vor ovel, gy mogen dencken, des doe my neyn noet, ic wolde ju noede unrecht scryven, ic wel al myn selschop breken und nummer also vele selscop mer hebben, also ic ghedaen hebbe und wel by eynbrengen al dat ic kan und seyn dan met juwer hulppe, dat ic my berge also ic best kan. Kunde my hyrnest dat myne ut Lubeke werden, so weret gud, sorget nicht, woe ic ut desser noet kome, so sal dat noch al gud werden bynnen kord, ef Got (wel). Ramet des besten in allen dyngen und scryvet my sunder suomen antworde; est dat gy my neyn gelt schycken in dey mysse, so satet ju op gelt und ok segget Losekynge, hevet hey my dat gelt nicht sand, so moet ic dat overkopen also solde ic vor 1 Rynschen gulden 1 crone geven to Bruogge, dyt moet syn. Got geve, dat ic daran komen kunne und my dey lude gheloven wellen, so est al gud.
Item vorkopet al dat gy hebben van der selscop wegen und maket gelt war gy kunnen und ic wolde dat sey ju van Lubeke mer gudes sand hedden; to Francvord es neyn gud, dar uns icht van werden moge. Slyper sal syn leynde gelt nowe inkrygen. Anders nicht, men latet al dync by ju blyven und doet dat beste al umme. Grotet myn suoster und al vrunt Ghescreven op unser leyven vrowen dach asumptyonis. Got und unse leyve vrowe helppe al unser sorgen eynen guden eynde, des were wol tyt und ok wol noet.
: Briefwechsel Hildebrand Veckinchusen. Leipzig: S. Hirzel, 1921, Seite 21. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_092.jpg&oldid=- (Version vom 31.7.2018)
