|
Wilhelm Stieda (Hrsg.): Briefwechsel Hildebrand Veckinchusen |
|
|
ik betalt werden. Item konde gy raken, op de balle witter syden mit den langhen haspen dat solde uns to bate komen to der andern syde. Ludeke Lutterke hadde nu ene balle witter zyde, de was groff, de vorkoffte he dure noch by mynen besten ume 5½ mark unde nam altomale sin rede ghelt. Desulven vrowen, de van my pleghen to kopene, de kreghen dar ok wat van unde gheven eme dat ghelt unde ik mot des enberen. Item, Hildebrant, dot wol alse verne alset ju ghenoghet unde stat, dat eventur mede van der syde, de ik hir noch hebbe to vorkopene. Ik en wel dar anders nicht by don, dan ik van ju nemen wolde unde ik meine, dat wy anders neine kopenscop dar ghekofft en hedden dan slechssyde, dat et vor uns solde west hebben.
Item, Hildebrant, des witten wandes es to luttik to eme rocke off clede, anders hedde ik dat alrede vorkofft; doch ik wel des besten ramen.
Item unse Here Got geve ju vele gheluckes mit juwen junggen sone, unde ik hope to Gode dat et hir binnen kort so werden sole, dat gy herkomen solen mit den olden unde nit den junggen unde mit Margreten mede. Dat vorlanghet my unde ok som ander vrunde tomale seer na. Hildebrant, na al minen 5 sinnen, so en wet ik nerghen, dar et ju beter were dan hir, alse verne als et op 1 punte komet alse ik hope, dat et don sal, wante unser statscriver is averlank ghekomen unde unse heren van hir ut der stat sin op deme weghe herwardes, unde ik hope, dat et al ghevleghen sole werden alse mit den van buten. Hildebrant, wes hirane is, dat sal my in 5 daghe wol to wetene werden unde so wel ik et ju scriven mit den ersten. Dit moghe gy ok Tideman Borstal seggen. Hirmede blivet ghesunt. Ghescreven 6 daghe in augusto anno 15.
108. Thomas Veckinhusen in Riga an Hildebrand Veckinhusen in Brügge. – 1415 Septbr. 30.
- Rev. St.-A. Orig. Pap. Adr.: An Hildebrant Vockinchusen to Brugge littera detur.
Minen denst thovoren ghescreven, wetet vedder Hildebrant, dat ic van der ghenaden Godes wol in Prusen ghekomen bin, Got sy ghelovet. Item so wil my hir Tydeke Swarte untrychten 50 mark Prus, nu my nicht mer werden en kan, nu wil ic de 50 mark van eme nemen. Leve vedder doet wol, also ic ju ok bat unde vorwart dat io also hir, dat ic in den ghelde nicht vorsumet en werde uppe wynachten[1]. Unde scrivet my met den ersten, van wem ic et eschen sal hir, wante my duncket, dat Tydeman Swarte overten wil, wante ic hope hir lychte tegen wynachten wedder to wesen edder hir enen to senden. My duncket dat dat ghelt hir unwert is, de nobelen gelden hir by 10 fr; al sante gy hir nobelen, gy solden also wol doen also met ander ware. Hirumme sal ic to mynen ghelde wedder komen, so moet ic by tyden sen, wes ic mede to doende hebbe. De grossen de sin hir ok dure.
- ↑ 26. Dezbr.
: Briefwechsel Hildebrand Veckinchusen. Leipzig: S. Hirzel, 1921, Seite 61. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_132.jpg&oldid=- (Version vom 31.7.2018)
