|
Wilhelm Stieda (Hrsg.): Briefwechsel Hildebrand Veckinchusen |
|
|
| To ersten in schepper Hartwych Scroder | 400 korve | |
| Item darnest in Johan Crogher | 200 „ | |
| Item in Volmer vanme Haghen | 150 „ | |
| Item in Bernt van Weyghe | 139 „ | unde 8 fate |
| Item in Boden Winnychusen | 248 „ | unde 10 fate |
| in dessen 10 faten unde 8 fate, dar es inne tohope | 113 „ | fyghen. |
Aldus so es desser fyghen over al in dessen 5 scheppen vorscreven 1250 korve; aldus so beholden wy hir 50 korve van den slechten fyghen, dar sal uns nicht velle van werden; wes uns darvan wert, dey bate wyl unsse sin.
Item so stan dey fyghen in al to unghelde wente to Hamborch by 15 ℔ gr. Desse 50 korve vor nicht gherekent, so stet uns elk korf fyghen by den 46 gr. 12 myten. Hirna weten ju na to rychten int vorkopen, Herman, gude vrent. Hir an dessen fyghen sal neymant gheyn last hebben to vorkopen dan gy unde ick. Bertram wyl, ofte God, by ju sin, so ick ersten mach so wyl ick ju helppen ramen unde alle dynch wol berychten bet dan wy ju scryven kan.
Item so bydden wy ju, dat gy wol don unde teyn sulven to Hamborch also dey fyghen dar komen, ofte God wyl, dat gy sey laten op scheppen, dat sey wol vorwart werden unde dat sey ok nicht to worpen werden unde sendet to Lubeke, wat et ju best dunket sin unde profyt es to Lubeke.
Item dey fyghen in Boden Winnynchusen also 248 marc korve unde 10 fate unde in den 8 faten in Bernd Weyghen, dat sin snodeste fyghen desser es al tohope in den 18 faten myt den 248 korven 361 korve unde der besten is in den andern 4 schepen 889 korve. Herman gude vrent hirby so ramet des aller besten dat gy kunnen unde moghen unde latet ju dar nicht lede to. Dyt es gud gud also gy, ofte God wyl, solt seyn. God geve beholden reysse, amen.
Item Herman dunket ju profyt syn so sendet uns desser fyghen so velle to Lunenborch also gy meynen, dat men dar behovet unde ok vort an Opert; darinne so ramet des besten to unsen profyte. Darmede so moyte ju dey almechtyghe God bewaren ewychlyken bewaren. Ghescreven 15 dage in ocktober 1420 in Brugge, dat es 8 dage na sante Dynyssejus dage.
Hildebrant Veckinchusen.
Desse breyf es op den sin van Berttrames Rennenberch scryf, dat es by kars op ein sin.
254. Eigenhändige Aufzeichnung des Hildebrand Veckinchusen über seine geschäftliche Lage. – 1420 Decbr. 8.
- Rev. St.-A.
Int jar uns heren 1420, 8 in desember do wyste ick Hildebrant Veckinchuse nicht in dessen 3 langhen boyken, dat my mochte to profyte komen dan ofte ich mochte einbreken an welken donde dat to enygher andern rekenschop droge.
: Briefwechsel Hildebrand Veckinchusen. Leipzig: S. Hirzel, 1921, Seite 157. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_280.jpg&oldid=- (Version vom 31.7.2018)
