Item ik hebbe Gerwine Marscheden ghescreven, dat he des koppers en deels herwardes sende op en vorsoekent.
Item, Zyvert, ik hebbe van diner weghene entfangen 52 mark 4 sl. alse van den kemerers.
Item des bistu my weder van ener [rekenscop] 61 mark 2 sl. Item, ghegeven vor Lyfflantsche breve 4 sl. Item ghedan Alff Veckinchusen 6 mark. Item Zyverde, dinen sone, ghesant 2 mark. Item ghegeven vor enen breff, den ik Hildebrant to Luneborghe in dat market sande den du screven haddest, 9 sl. [Item] noch Zyverde, dinen sone, ghedan 6 Arnamsche gulden, de maken 5 mark 1 sl. Summa dat ik weder utghegeven hebbe 20 mark al effen. Aldus gheve ik Hildebrant 32 mark 4 sl. Darmede is dat slecht.
294. Engelbrecht Veckinchusen in Brügge an Hildebrand Veckinchusen in Köln. – 1421 Aug. 17.
- Rev. St.-A. Orig. Adr.: An Hildebrand Veckinchusen to Kollen in dem dorn littera detur.
Vruntlike grote tovoren gescreven unde wes ic gudes vormach. Hildebrant, leve vedder, ju geleve to weten, dat ic juwe breve vuste wol vornommen hebbe; werlyke vedder, ic solde ju gerne dat beste raden, dat ic kunde, men so my duncket myt weme ic my lever (!) vrage, de en sy nicht al vrunt, so my duncket, God de betert al. Gy wyllen vuste antworde hebben van Derssowen unde Gerwyn van Espen unse Lensendyk, mer se en wyllen syc hir nicht mede moyen; dergelyken so en wyl unse werd hir ok nicht vele to doen unde lecht alle syne synne hir to, dat he ju wedder in de cluven krege. Hirumme vedder duncket my best, dat gy ju hirvor wachten, queme gy hir in den sten, ic hedde angest, dat gy enen jamerlyken dot sterven solden, wente gy en hebben nicht to vorteren unde solde vrunde verdreten, dat se ju in den sten up groter kost holden solden. Hirumme so en kene gy ju nicht te vullen gewachten, wante ic hore hir vele unde mene jy myt truwen. Hirumme so scryve ic ju ok den groven syn, dar et by steyt by dat gy ju de bet wachten mogen wante my van herten let were, dat gy in vencnisse quemen. Unde gy scryven my ok, dat ic ju wol sole doen unde geven Jacob, unsem werde de 9 ℔ gr. 7 sl., vedder, al dede ic ju dyt to gude, dat ic ju dyt gelt lende, so wert allyke na wante ander lude ok dat ere van em hebben wyllen. Nu et nicht anders werden wyl, so lat et bestan, et is beter, dat gy et vorteren oft ju kynder, dan ic em dyt gelt geven solde, muchte et ju to bate gekomen hebben. Ic hedde et em lange gegeven unde hette et ju gelent men et is al vorloren, wat men unsem werde doeyt. Hirumme so set dat gy ju waren, dat is myn rat nu et hir to gekomen is. God de voge alle dinck to dem besten. Vort so scryve gy van Arnt Schulten, ic hebbe ene gespreken, my dunket, dat he na dem breve nicht vele en vraget unde wyset my al up de anderen. Unde van mester Johan de Myl, dar en kan ic den hovetbref nicht afgekrygen.
Vort vedder, so hebbe ic nu tydynge, wo dat Hermen Kerchof myn suster hebben sal und her Hildebrant van dem Bokel sal to Revel ok en
Briefwechsel Hildebrand Veckinchusen, Seite 318. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_318.jpg&oldid=- (Version vom 31.7.2018)
