304. Tideman Brekelvelde (in Lübeck) an Hildebrand Veckinchusen in Brügge. – 1421 Nov. 18.
- Rev. St.-A. Orig. Pap. Adr.: An Hildebrand Veckinchusen to Brugge littera detur.
Vruntlike grote tovorne screven. Wetet, Hildebrant, gude vrunt, dat ik juwe breve vuste al wol vornomen hebbe unde ik en hebbe ju nicht vele weder ghescreven. Dat is darby to ghekomen, dat ik ju sunderlinge nicht to scrivene en wiste. Doch, Hildebrant, alle vrunt sin wol to reke unde juwe kindere unde Margrete sin al ghesunt.
Item so is Zyverd, juwe brodere, nu hir, doch so en ghet he nicht vele ut, wante he hevet en quat oghe. Doch et sal drade gut werden. Item, Hildebrant, so gheleve ju to wetene, dat Hinrik opme Orde unde ik nu en sunavende latest vorleden de eghendom juwes huzes hern Hinrike Rapesulver vor deme rade vorpanden vor 100 mark Lub., an sin ghelt, dat he noch hebben solde. Dit hebbe wy mest darume ghedan, dat gy desde sekere sin, dat Margreten dar numment utdriven en kan unde her Hinrik de sal wol don, dat wol ghedan is. Dit hebbe wy ghedan na rade juwes brodere unde Margreten.
Item, nu hevet Evert Molken wol to uns ghewest unde seghe gherne, dat wy eme al inghedome, bede buten unde binden, vorpanden wolden. Des sy wy unberaden, also dat wy des nicht don en wellen. Wes Margrete off Zyvert don wellen, dar en lecht uns nicht ane. Item, Evert de hevet my harde to ghedan in 3 daghen unde wel van my hebben 200 mark Lub. unde secht, ik hebbe se eme ghelovet to ghevene unde secht noch mer, dat ik eme 200 mark tosecht hebbe to ghevene op winachten, des ik doch nicht ghedan en hebbe. Ik en hebbe ny summa tosecht to ghevene, mer also vele, alse ik van juwer wegen hedde, dat wolde ik eme gheven, des were luttik off vele. Doch so hebbe ik eme also vele ghesecht, dat ik hopede, dat ik eme nu op winachten by den 100 mark gheven wolde. Dat seghede ik eme des nu en sundaghe 8 daghe was alse wy tosamene to der Kastorpeschen brutlochte weren. Hildebrant, nu secht he, dat ik eme 200 mark tosecht hebbe, des doch nicht en is, unde ik hebbet nu overrekent, dat ik noch nicht mer in al van ghelde entfanghen en hebbe dan 100 unde 60 mark 12 sl. 7 ₰. Dit boret eme halff. Dit sal beret sin, wanner dat he wel. De vrowen betalen tomale ovel; dat komet darby to, dat se neine losinghe en hebben van den doeken. Ik hebbe noch unvorkofft 12 ℔ van der syde, de Everde unde my tohoret, unde ik en hebbe nicht mer dan 8½ ℔ vorkofft van der syden de Dyrk Borgher mede tohoret, wante se is tomale groff. Hirmede blivet ghesunt. Ghescreven op sunte Elzeben avent anno 21.
Briefwechsel Hildebrand Veckinchusen, Seite 325. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_325.jpg&oldid=- (Version vom 31.7.2018)
