Seite:Briefwechsel Hildebrand Veckinchusen 402.jpg

Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

	Wilhelm Stieda (Hrsg.): Briefwechsel Hildebrand Veckinchusen

Ic hope nicht, dat ic dat tegen ju vordeynt hebbe. Ic wolde, dat gy ute weren unde wy by eyn mochten komen unde seyn, welk van uns recht were; unde my duncket al, dat ic doe eder ghedaen hebbe int best. Dat neme gy al vor unwyllen unde es ju to undancke unde myne macht es cleyne, dar welle gy nicht an dencken. Myn rat es noch, alse ic ju vele screven hebbe, dat gy ju ut dem steyne helppen unde dencken op eyne stede to komen, dar gy vry unvorhaftet blyven mogen. So mochte gy dencken met vrunde hu^elppe des besten vort to ramen op dat gy ju^ewer sorge op eynen betern eynde mochten komen, des uns Got al umme helppen mote. Ghescreven 13 dage na sunte Mychele anno 24.

Zyvert Veckynchusen, Lubeke.

388. Reinhold Swarte aus Köln an Hildebrand Veckinchusen in Brügge. – 1424 Novbr. 13.

Rev. St.-A. Orig. Pap. Adr.: Hillebrand Vockinchusen to Brugge littera detur. Darunter von H. V. Hand: 1424, 26 dage in november.

Vruntlike grote vorgescreven und wes ich gudes vermach. Wetet leyve om Hillebrand, dat ich juwen bref wol vorstan hebbe, dey an Bokel mede sprach, unse leyve Hergod mote ju helpen med leyve ut den stene und dey hilgen dre konynge und ich wolde, dat dey Lumbard noch med ju in den stene sete, byd so lange, dat hey ju ledych und loes leyte. Item, leyve Hillebrand o^em, so doet my myn broder to Venedye so als my myn broder Conrad doet, hirum so en kan ich ju gen geld gesenden op dysse tyt, God beterd al umme. Und ich weld hirnest gerne betern, of God wel, anders nycht. Dan gebeidet to my. God zy med ju. Gescreven des mandages na sunte Merten anno 24 jar.

Reynolt Swarte van Collen.

389. Gerd van Mynden an Hildebrand Veckinchusen. – 1424.

Rev. St.-A. Orig. Pap.; eine Adresse ist nicht vorhanden. Auf der Rückseite steht von H. V. Hand: Ghert van Mynden int jar uns heren 1424 jar.

Item, Hildebrant Vyckinchusen, gude vrunt, juwe breve hebbe ick wol vorstan. Ick hebbet Ewert van Meghen und Lensendyke to kenne geven. Lensendyk de secht alse hy tohope gerekent hebben, wes ju den bort, dar is he borghe vor myt korten worden, he en steyt ju nicht to, er de rekeninge to is gegan, dar moghe ghy up denken und sen wes ghy to donde hebben. Evert van Meghen de lecht et al up Suderman bet de kümpt. Ok so hebbe ik myt Hinrik Hope sproken van dessen sulven stucke, de is krank, de secht he en kans sik nicht moeyen. Aldus en wet ik nicht wat ik darto don sol. Hirmede sit Gode bevolen. Ik wolde wol dat es en gute ende wer.

Gert van Mynden.

Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 402. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_402.jpg&oldid=- (Version vom 31.7.2018)