Seite:Briefwechsel Hildebrand Veckinchusen 413.jpg

aus Wikisource, der freien Quellensammlung
Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.


400. Margarethe Veckinchusen in Lübeck an Hildebrand Veckinchusen in Brügge. – 1425 Mai 14.

Rev. St.-A. Adr.: An Hillebrant Veckinchusen. Orig. mit den Resten des Siegels. In dorso von der Hand des Empfängers: 1425 op pinxsten dach[1].

Vruntlike grote tovoren unde wes ik godes vormach. Hildebrant, leve man, jou geleft to weten, dat wy jowe breve wol vorstan hebben, dye gy ons sanden by Honde den loper, dye wart ons up sunte Markus dach[2], also gy ons scryvet, dat gy van der genade Godes ut deme stene sint, des sy Got gebenedyet unde gelovet unde Got helpe ons, dat gy met leve hyer komen. Ok Hildebrant, leve man, jou geleft to weten, also gy my scryvet, dat yk jou scryven scal, so wes ic vorkoft hebbe unde wat yk utgeset hebbe, des en kan ik jou nu ter tyt nycht gescryven. Want gy, ef Got wyl, hier komt, so wyl ik jou alle dynck klarliken seggen, dye wat van onser wegen hebbet, dye scolt jou wol to sprekende werden unde scoelt den alle dynck wol klarliken weten. Daromme doet vol unde spodet jou van dar, also gy ersten konnen, dat wert vor jou unde vor ons altomalen. Ok so heft her Hinryck Rapesulver Lutken gesproken, dy secht also, he wyl al so vele doen also en ander unde mer dan dye Lombarde jummer doen scolen. Unde wo et umme Kolen is, das scryft jou jou broder wol. Anders en kan yk jou nycht gescryven up des tyt. Got beholde jou gesont to langer tyt. Gescreven met der hast des mandages in der krusseveken.

By my Gretke Veckinchusen.


401. Johannes van dem Bokele in Köln an Hildebrand Veckinchusen in Brügge. – 1425 Mai 14.

Rev. St.-A. Orig. Pap. Adr.: An Hyldebrande Vockinchusen tho Brueghe. Darunter von H. V. Hand: 1425 jar 21 in meye.

Vrentlike grote voren. Leyve om Hildebrant, juwe breyve unde bodesschop by Herbort Tasschen hebben Reynold Zwarte unde ick wol vorstan unde darop hebbe wy unseren vrunden tho Lubeke unse gudduncken ghescreven an Hinrich optem Orde Everd Moyelken Tideman Brekelvelden unde an juwen broder Zyverde, darna moghen se met vrunden vorder spreken unde scryven ju des samentlike vor uns alle eren sin unde antworde, dar gy ju na richten moghen. Anders so en wete wy dar nicht opthoscryven off buten unseren wenden dar tho doende.

Item, leyve om, so merke ich dat gy wol geldes unde bystandicheit behoveden unde begherende sind. Nu moghe gy dencken wat ich tobrenghen kan na dem male dat my van seligen Thomase de selscap achter blyvet unde met beyden Marscheden unde wat to Lubeke is, dat bescryvt my juwe broder war he kan unde met den van Dorpmunde byn ich tho groten

  1. ↑ 27. Mai.
  2. ↑ 25. April.
Empfohlene Zitierweise:
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 413. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_413.jpg&oldid=- (Version vom 31.7.2018)
Von „https://de.wikisource.org/w/index.php?title=Seite:Briefwechsel_Hildebrand_Veckinchusen_413.jpg&oldid=3224765“