408. Tideman Brekelvelde (in Lübeck) an Hildebrand Veckinchusen in Brügge. – 1425 November 22.
- Rev. St.-A. Orig. Pap. Adr.: An Hildebrand Veckinchuss to Brugge littera detur. Darunter von H. V. Hand: 1425, 16 in desember.
Vruntlike grote unde wes ik gudes vormach tovorne screven. Wetet Hildebrand, gude vrunt, dat ik juwen breff wol vornomen hebbe, alse gy screven dat ju Sunnenschin van miner weghene gheantwort hebbe 6 ℔ gr. und tovorne hebbe he ju 5 ℔ gr. gheantwort, dit sy tosamene 11 ℔ gr. Hildebrand dit wet ik wol. Vort scrive gy, wo ju Margrete screven hebbe, wo er hir en vrunt ghesecht hedde, de wolde ju 5 ℔ gr. dar werden laten und gy screven wanner dat gy de 5 ℔ gr. hedden, so moste gy dan noch 9 ℔ gr. hebben, dar ik wol don solde unde spreken hir mit den vrunden, dat ju de werden mochten, des so wetet, dat ik hir niement en wet, de ju to helpe mit 1 ℔ gr. komen wel, dewile dat gy dar sin unde alse wy vornomen hebben, so mochte gy wol nu[1] den boden herwardes in erem ghelede komen hebben, men gy en wolden nicht unde gy volgen juwen sinne also vuste wie vor[1]. Hildebrand, ik en wet dar nicht mer to donde, eneme jeweliken wert an deme sine banghe noch, de neringe is krank unde de lude sin kostel[1], also dat eneme jeweliken nicht[1] vele over en lopet. Unde leve Hildebrand alse gy screven, dat gy nicht van dar en wellen, gy en scheden mit eren van dar, des ghunnen wy altomale wol, men ik en kan nicht gheweten, wo dat gy deme don wellen, dewile dat ik ju nicht mer gheldes en wet to hebbene dan gy noth hebben, seker Hildebrant, ik en wet hir nemende to sprekene, de ghelt vor ju utlegghen wil. Zyverd secht my, dat he vuste utghelecht hebbe alse ik eme des ok wol ghelove unde noch wol don solde, wanner dat et helpen mochte. Nemed et in dat beste, dat ik ju aldink so vrotliken scrive, wante wat my in deme herten is, dat scrive ik ju. Hirmede bevele ik ju Gode. Ghescreven op sunte Clementis avent anno 25.
Item boven de 11 ℔ gr. hebbe ik Margreten noch by 50 m. Lub. ghelenet.
409. Reinhold Swarte in Köln an Hildebrand Veckinchusen in Brügge. – 1425 Dezember 24.
- Rev. St.-A. Orig. Pap. Adr.: An Hillebrand Vockinchusen to Brugge littera detur. Darunter von H. V. Hand: 1426 jar 4 dage in jannewario.
Vruntlike grote vorgescreven und wes ich gudes vormach. Wetet leyve om Hillebrand, dat ich juwen breve wol vorstan hebbe. Item so als ich ju latest scref op dat scharlaken, so scryve ich ju noch, dat ich ju gen scharlaken schuldich en byn. Gy en scryven my mer underschedes dan
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 418. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_418.jpg&oldid=- (Version vom 31.7.2018)
