lincken seiten abwertz die Quadratwurtzeln dergestalt verzeichnet stehn / das oben die centenarij, (das ist / die jenige zahlen / so mit 100. auffgehn) vnd auff der seit / was vnter 100. ist / gesetzt wirdt: In der Tafel aber selbsten / oder in der feldung / stehn die Quadratzahlen derselben wurtzlen. So derwegen ein Quadratwurtzel vorgeben / vnd dessen Quadrat zu wissen begert wirdt / so nim derselben jhre Centenarios oben / vnd was vnter 100. ist / auff der lincken seiten / so wirstu in gemeinem winckel der Tafel das begerte Quadrat finden. Zum Exempel / man begert zu wissen / was die wurtzel 1240. für ein quadrat habe. Die Centenarios, nemblich 1200. nim in der öbersten vberzwerchen / die 40. aber in der lincken absteigenden seit: Vnd wo die linien / deren eine von den Centenarijs 1200. vnterwerts / die ander von 40. vberzwerch gezogen wirdt / zusammen stossen / allda ist der gemeine winckel / so das begerte quadrat / nemblich 1537600. in sich haltet.
Wo aber die vorgebene wurtzel keine Centenarios in sich hielte / als wann das quadrat der wurtzel 63. begert würde / wirdt also gesucht: oben nun die figur 0. vnd auff der seit 63. so wirdt der gemeine winckel geben das quadrat 3969.
Im fall die vorgebene wurtzel grösser were als 11100. muß jhr quadrat durch multiplication in sich selbst / wie sonsten gebreuchlich: oder aber auß diesen Taflen solcher gestalt gesucht werden. Die vorgebene wurtzel dividier mit 2. 3. 4. oder einer andern zahl / dardurch sie auffgeht. Deß quotienten Quadrat nim auß der Tafel: solches quadrat multiplicier mit dem quadrat deß theilers: was kombt / ist das quadrat der vorgebenen zahl. Als / weil die wurtzel 23685. nicht in der Tafel begriffen /
Matthias Bernegger: Manuale Mathematicum. Straßburg: Paul Ledertz, 1619, Seite 265. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_265.jpg&oldid=- (Version vom 31.7.2018)
