8. Engelbrecht Witte aus Riga an Hildebrand Veckinchusen in Brügge. – 1404 Octbr. 6.
- Rev. St.-A. Orig. Pap. Adr: An Hylbrant Veckinchuosen tho Bruegge sal desse brief detur. Darunter von H. V. Hand: 1404 19 in desembere.
Vruntlike grote thovoren ghescreven und wes ich guedes vormacht an mynen leven swagher Hyllebrant Veckinchuesen. Wetet, dat ic juwen brief wol vernomen hebbe. Und Evert, myne neve, is wol overkomen und quam 8 dage na suente Mychghiel. Und God danke, leve swagher, dat ghy uns dinc sueverliken untfangen hebbet und sueverliken weder van jue ghesant hebben. Und swagher, als ghy my scriven van unserer handelinge, dat ic jue ghelovet solde hebben huendert marc, dat ghy tughen up her Kort Wyscht, dat en sal my her Kort nicht overtueghen, of nyement overtueghen, went dat wyl ic wol bewisen myt unsen dedingesluden, de darover und an weren, de heb ic vor des sittendes stoles des rades ghehad, dar jue broder teghenwerdicht sat und her Kort Wisch, dar wart juwen broder overtughet. Wenner ghy der hundert marc nicht untberen wolden, so solde he se utgheven. Desse dedinge sint in des stades boek ghescreven, wes ic jue dar lavede. Und wyl ghy et van juwen broder manen, dat moghe gy doen und wyl gy et van my hebben, dat ic en darum mane, dat wyl ic echter doen. Und jue broder is deghene, de de unnuette dedin dar en tuschen ghemaket hevet, anders niemet. Und swagher, ghy maket vele to doen um de huendert marc und ic wylt betugen myt al den ghenen, de dar over und ane weren, dat ic er jue nicht plichtich en sy to gheven. Mer wolde ghy komen by uns, et en solde nicht to doende wesen umme 3 huendert marc ofte 4 und gy maket vele to doen um de huendert marc. Und swagher, als my de dedin vorkomen sint und ghescreven vert, dat ghy dar wat um don wolden, dar moge gy up denken, dat muechte jue und den juewen gheringe schaden en duesent marc ofte mer, went wy en en hebbet mer en leint, went sla ghy to verdriet myt my an, so wyl ic al an rent leggen und wyllet wol maken, dat es jue nicht vele tor hant enkome, nocht anderen vrunden. Denket hir des besten in und scryvet my en antwort, als ghy irste kuennen; doet wol, leve swagher. Also van den schepen, dar hadde ic inne 13 schippunt was und en tunne werkes und myn geselle Kort Vorsel ok en tunne werkes und an Boutin hadde ic en sestiendeel und he was my schuldicht en marc Rig. und mynes wasses was 17 stucke. Vortmer so is in der tunne int irste en dusent troienisse, de sin ghebuende by 10 und by 15 und nocht 8 timmer troienisse, de sin van den besten und nocht in dersulven tunne 3000 und 23 timmer und en tendelinc Smoelensch werk und nocht 12 timmer rodes werkes und 4 timmer packinge myn en tendelinc und 4 dusent schevenissen myn en quartier. Doet wol und doet dat beste hirby. Vortmer so hadde Bernt darinne an kleinut, an hernes und an klederen 2 kysten und an dingen, dat he mede had, de wy gherekent hebben up 70 nobelen. Doet wol und ramet des besten umme al und ghebiet uns to allen dat wy vormogen. Doet wol und nemet es nicht to unwyllen, dat ic jue dus varliken
Briefwechsel Hildebrand Veckinchusen, Seite 5. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_005.jpg&oldid=- (Version vom 18.8.2016)
