|
Wilhelm Stieda (Hrsg.): Briefwechsel Hildebrand Veckinchusen |
|
|
dat hord Arnd Wachendorppe half und ju und my half aldus 
dat sal overal wegen 4554 punt, elk 100 steyt 16 Rynsche gulden
sunder al ungelt. Doet wol und vorkopet dyt was also in best tyt
duncket und kunde gy uns kopen 1 tunne schons werx ofte also vele schon
werk also dyt was gelden mach. Kunne gy schone werk kopen umme 5 sl.
myn dan 12 ℔ gr. kunne gy dat darumme nicht kopen, so kopet uns dat gelt
in dey mysse to Francvord to untfangen int eyrste van der myssen by
wyssen luden wand wy moten dat gelt vor dyt was int eyrste van der
myssen betalen. Wy kunnen dyt was nicht wol myn dan 500 marc tuogen,
ic meyne dat sole mer gelden. Ramet ummer dat wy nicht vorleysen
dorven.
Item ic sende ju mest al unse was in Doenwolde vorscreven 4 grote stucke und 3 stro, dar syn inne 27 cleyne stucke und ic meyne dar noch in to schepen also ic mest kan. Desse schepper sal ju dyt was al to Bruogge levern und sal van elken groten stucke 2 gulden myn 1 ord hebben und vor dey 3 stro vor elk stro sal hey 2 gulden hebben. Ic wel ju al beschet ok by deme scheppern scryven. In al doet dat beste und scryvet uns al tyt sunder suomen al tydynge van den wasse. Ic hope dar sole profyt ane vallen.
Item to Lubeke es neyn was und ic vruochte sey kopen uns nicht. Item so wellen alle hern opholden op dey dey den van Lubeke tovoren und afvoren und hebben grot gud opholden und dat wel nu eyrst to reyden ovel to staene met den van Lubeke, also ic ju hyr nest wol scryven wel, Got voge al dync to den besten, ic kan ju van der Venedyeschen selscop noch nicht scryven, ic wolde dat wy unse gelt weder hedden, doch ic hope wy solen nicht vorleysen men uns kan met der hast neyn reyde gelt werden, er op den sommer. Got voge al dync to den besten al umme. Grotet alle vrunt. Ghescreven op der hyllegen 3 konynge avent 1412 jar. Got geve uns allen eyn vrolych salych nye jar and vele luockes, des behove wy wol.
66. Ludewig Buggendal an Hildebrant Veckinchusen in Brügge. — 1412 Jan. 6.
- Rev. St.-A. Orig. Pap. mit den Resten des briefschliessenden Secrets. Adr.: An Hildebrand Veckinchusen to Brugge detur littera.
Minen denst wetet Hildebrant, guode vrent alzo gy my scryven van dem engever unde wy wolden en also gerne vorkopen, alzo gi et gerne segen, wan wy konden, des moge wol geloven, wy willen dat beste darby doen; dat erste dat wy eymande konen krygen, de dar an wel, so wille wy en gerne vorkopen. Got late juo gesuont. Gescreven op der hilligen 3 konige dage 1412.
: Briefwechsel Hildebrand Veckinchusen. Leipzig: S. Hirzel, 1921, Seite 9. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_080.jpg&oldid=- (Version vom 31.7.2018)
