Seite:Briefwechsel Hildebrand Veckinchusen 081.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Wilhelm Stieda (Hrsg.): Briefwechsel Hildebrand Veckinchusen

67. Sivert Veckinchusen in Köln an Hildebrand Veckinchusen in Brügge. — 1412 Jan. 13.

Rev. St.-A. Orig. Pap. Adr.: An Hyldebrand Veckynchusen to Bru^egge littera detur.

Item leyve broder ic sy ju van Lysekens rekenscop nicht mer schuldych dan overal na ju^ewer egen rekenscop men 166 marc 4 sl. und 2 ₰, dat es recht wan gy darane afslaen vor 18 marc Prusch 36 marc und 10 sl., so bleve ic darvan nicht mer dan 127 marc und 10 sl. Lub. 2 ₰. Dey 36 marc 10 sl. nemet weder, dar sey van boren to nemen, und scryvet dey in unse selschop, men ic meyne, dey komen ut der Venedyeschen selscop to nemen. Lyseke hedde dar 36 marc 10 sl. nicht utgeven, hedde gy er dat nicht screven, darumme kan dat neyman bet recht maken, ic sy er nicht schuldych, dat wet ic wol.

Item ic (sy) noch schuldych vor 24 marc Prusch 50 marc Lub. Item ic sy noch schuldych 216 marc, dey Gerd Salmesteyne geven worden, komet dyt al in unse selschop, so nemet ofte rekent dar also vele tegen af van deme dat gy my toscreven hadden und dat Hans van Mynden untfangen hadde und gy my to rekent hadden in dey 864 marc 11½ sl. und slechtet also dat eyne tegen dat ander. Item so sy ic ju propper van Tyten und Swartten wegen und 1 Ypersch laken tohope 188 marc myn 6 ₰, item noch vor den rys 13 ℔ myn 1 gr. und gy scryven dat gy allentelen vor my utgeven hebben 46 ℔ 4 sl. 9½ gr. Ic bydde ju, dat gy my dar ok rekenscop van scryven op dat ic aldync clar scryven moge. Item umme dey 50 ℔ gr., dey ic ju ok propper schuldych sy, dar sy wy wol eyns umme dyt hebbe ic aldus in bok screven op gude rekenscop also lange, dat gy my al besehet weder scryven, so welle ic dan al rekenscop slechten und doeden op eyn eynde, dyt nemet nicht vor ovel, dat ic ju also vele moge met desser rekenscop. Item doet wol und ramet des besten in allen dyngen sunderlynges by deme wasse ofte wy in eynen wech vorleysen, so wynnen wy eyn an deme andern weder. Item Hans Losekync sende ic an Bertram Herrentrey und sal des dages 2 gr. vortern und berychtet Bertram warumme ic en van ju neme und an en sende und byddet ene, dat hey dat nicht vor ovel neme und weset gy Losekynge lyke vruntlyk und behulpplyc, hey sal ju ok ghelyk underdanych syn. Wolde Got geven, dat et to Lubeke gud worde, so mochte dar profyt an vallen und so wolde gy und ic des wol eyns met ju werden und grotet alle vrunt und myn su^ester und beydet over my. Ghescreven 8 dage na der hyllegen 3 konynge dach 1412 jar.

Zyverd Vockynchusen, Kolnne.

Item leyve broder my duncket gud, dat gy my eynen machtbreyf senden dar gy my inne mechtych maken juwes parttes und selschop dey gy met Slyper und my und Peter Karbow hebben, dyt es nutte umme vele sake wyllen oftes noet worde. Slyper hevet my ok mechtych maket und ic wel to Francvord ward und weten nicht, wo et Peter met uns vord holden

wel und wolde hey ovele des sal hey, ef Got wel, neyne macht hebben.

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 81. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_081.jpg&oldid=- (Version vom 31.7.2018)