|
Wilhelm Stieda (Hrsg.): Briefwechsel Hildebrand Veckinchusen |
|
|
welle, men dat gelt es cleyne unde hey wil my syn hus lenen 2 jar; ic hebben afgheleget dat ic noch nicht beraden sy eynyge voranderynge to doende unde hey seget my syn wyf unde vrunt hebben em van Lubeke vele hyrvan screven unde hedde gerne eyn antworde van my. Ic wel em anders neyn antworde geven unde gy ock noch anders nicht beraden unde ic meyne hyr welle nicht van weten.
Item my werd van Verynges anbrocht van der Kastorppesch unde vele grotes dynges toseget unde ofte dat met eren wyllen gheworven werd, des wet ic nicht, men dey dat wervet dey soget, dat sey em nicht bevolen hebbe. Darop late ic dat ok bestaen, wand ic meyne hyr sole ok nicht van werden, my es van soin anderen dyngen vorkommen dar al nicht van werden wel, wand est ic my ergen vorandern sol, so moste ic eyn del wyllen nemen beyde van personen unde vrunde unde gelde unde dat ic unde myn kinder unde vrunde darvan ghebetert mochten werden, anders sol dat nummer scheyn, ef Got wel, unde my solde hyr wol mest geldes werden unde ok van guden vrunden my es hyr angheboden beter dan 5000 gulden ward gudes unde ic wel nergen nicht an doen, er ic to Lubeke west hebbe unde ok er ic tidinge van ju hebbe. Wand ic sy es noch nicht beraden, dat ic my icht vorandern welle, dat en moge my alto wol vallen; dat et vor my unde myne kynder unde vrunt syn wolde, wand ic kome an my sulven wol, dat my vele tidiger und nutter wesen solde vor myn lyf unde seyle dat ic eyn ander leven anneme, Gode to deynen unde dechte op den langen wech, wand ic hebbe al myn levedage vaste der werlde deynt unde na titlyker nerynge ghestaen unde groten arbeyt ghedaen, dat were nu tyt Gode to deynen.
Unde ic bydde Gode, dat hey uns al umme des besten raden unde wysen mot, ic welt op myn seyle nemen en deden my myne kyndere unde som vrunt, ic wolde nummer op wyf dencken unde ok nummer van Kolnne komen to woenen unde ok hebbe ic noch neynen wyllen my to vorandern dat en moge my alto wol vallen na vrunde rade und der anwysinge Godes und dat ic ju dat scryve, dat doe ic in rechter vruntscap, op dat gy to komenden nicht seggen darvan, dat ic mynen egen synnen volgen welle unde dat ic op ju nicht en achte unde ok op dat gy mynen syn eyn del weten mogen oftet syk met my vortogerde dar to komen unde ok op dat gy my juwen guden rat unde gudduncken egentlyken weder scriven mogen. Item so wetet ok, dat my wol to male gude wege hyr vorvallen syn met myner dochter Greteken van guden personen unde vrunden unde vele geldes, unde es som vrunden hyr tomale leyt, dat ic Greteken van hyr sand hebbe, unde doen groten arbeyt darumme, unde ic segge al, sey sale in dar Akenvard hyr weder kommen unde solde ic ok hyr wonen, so wolde ic meyner kynder sunderlyngen myner dochter van my hyr nicht unberen umme neyn gelt, men ic hebbe den vrunden dar to leyve ghesand, also lange, dat men suot woe al dync vallen wel; ic wolde myn dochter hyr wol brengen, des eyn gans slechte wol to bet solde mogen, ic love, hedde ic also vele wyst vor sunte Mychele, also ic nu wet, Greyteke were in eynem nicht to Lubeke komen. Got voget noch al umme to den besten to ewycheyt. Leyven vrunde, gy mochten seggen, of ic myn vrunt wolde overgeven umme geldes wyllen, dat duochte nicht overgeven
: Briefwechsel Hildebrand Veckinchusen. Leipzig: S. Hirzel, 1921, Seite 30. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_217.jpg&oldid=- (Version vom 31.7.2018)
