|
Wilhelm Stieda (Hrsg.): Briefwechsel Hildebrand Veckinchusen |
|
|
noch vur 2 tonne to vracht 4 gulden. Item vur stocvysch to vracht 35 gulden. Item vur syse van stocvysch und an werk und van wasse, dat ic hir vorkoft hebbe 10 gulden. Item to underkope wegen dragen 2½ gulden und 1 knecht to Meens gesant umme ju wass to verkopen und eynen to Strasborch gesant nu na paeschen umme dat gelt und rekenschap van dem stocvysche, vertert 3 gulden und ju werk to Vrancfort to voren 5 gulden, summa van all utgeven 1069 gulden 8 wyt den.
Item van juwer wegen entfangen 17 stuck wasses, verkoft 14 stucke woch net 3226 punt to 14 gulden und 1 stucke woch 207 ℔ to 15 gulden myn 1 ord, so dat dit uns all gewegen heft 3819 ℔, so van gelde hirave werden 537 gulden 18 wyt den.
Item verkoft 3 stucke rakelvysch to 29 gulden, 1 vur 28 gulden und 2 stucke lotvysch to 36 gulden, summa van 6 stucke vysch 187 gulden. Item to Menss verkoft 2627 punt wasses to 15 gulden, summa 394 gulden. Item verkoft 1 tausend schoenwerkes vur 86 gulden und 1 tausend lusch werks 76 gulden. Dit kofte Lesken, die to Lubeke plach to wonen, des is he noch schuldich und wil my 4 tymmer blotes werkes afslaen, wat ic em geven moet, dat wil ic ju wael schryven. Item Fylippus hevet my antwordet to Meenss 697½ gulden.
Item noch van juwer wegen verkoft 345 ℔ bomwolle to 15 gulden, summa 51½ gulden. Item van all entfangen und verkoft vurscreven 2029 gulden 18 wyt den. Hiraen aefslagen 1000 gulden 69 gulden wyt den[1], so bleve ic ju 960 g½ gulden, des sal ic op sent Johans dage to Meenss vyrgeven 600 gulden, aldus moge ghi noch opnemen 360½ gulden und nicht mer.
Item hir staet noch 4 stuck lobben und die scholt to Bacharach, wad hirvan werde, dat es juwe, hirmede wer slecht unse rekenschap tuschen ju und my op dese tyt besonder dat ghi my van alder rekenschap schuldych syn, des doch nycht kleyn is und ic bidde ju dat ghi my dat geven willen, want ic des wael behove myn scholt mede to betalen dar my groet macht aen leget und dat wer wael tyt dat ghi my mede bedachten en maekden dat slecht; beware dese rekenschap wol; slecht ju icht hiraen, dat scryft my. Gescreven des frydages ny pynxten.
Und ic vruchte je kunne vur sante Mychele nicht to Lubeke komen. Got geve myt leven. Item broder, ic hebbe ju desser rekenscap ok eyn to Brugge sand, ic wolde dat ic bet in juwe saken kunde ghedaen hebben, dat were my leyf ghewesen, dat wet Got wol.
[2] Item my duncket guod dat myn dochter in dem closter blyve, wend ic dar scryve ic wel ju ut der Akervard al myn gudduncken scryven; myn dochter syn nergen beter dan in dem closter noch op dat eyrste und bestellet dat sey ere nottroft redelyken hebben. Ic wet ju nicht mer to scryven;
: Briefwechsel Hildebrand Veckinchusen. Leipzig: S. Hirzel, 1921, Seite 49. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_236.jpg&oldid=- (Version vom 31.7.2018)
