Travensolt gelt hir nue 21 mark de last, Mestensche laken 10 mark, Alstedesche by 16 marken dat par; Oldenardesche sint hir 1 fr. myn gegeven den 16 mark; Myddelbuesche sint gegeven vor 15½ mark; Herentalsche 22 mark; lange van Tynen 22 mark, de gut sin, Leydesche unde Amsterdamesche by 14½ mark; Kondytsche 5 mark 8 scot, Kuemesche 13 mark 1 frd.; Kamerykesche 14 mark. Olie gelt hir op desse tyt 34 mark; van mandelen, ryse, vigen en kan ik jue nicht scryven, rosinen es hir genouech. Ik en wet jue nue anders nicht to scryven den Got sy myt jue. Gebeydet over my; gy scryven my, dat gy gerne rekenschop wolden hebben van den olden dinge. Nue schelt my jo, dat ik dat gelt nicht al en hebbe, ik hedde se jue anders lange gescreven. Gescreven op sunte Borgardes dach 1400 int 19 jar.
Item so quam my dallink ein breyff van 150 marcken, de ik Groninge geven sal op Mertine[1], de hebbe ik em gelovet to geven, dyt es tosamen wol 700 mark de ik op de 5 terlinge untrychten sal myt dem wasse, dat ik jue sant hebbe. Hirop sint mede vordacht, ik hebbe nein gelt, dar ik jue mede vorleggen kan. De Alstedesche, de Buesche es noch nicht 1 vorkoft. My wart noch ny[WS 1] ₰ mer boden vor de Alstedesche den 8 mark, vor de Buesche 8 mark myn 1 frd. Hir en kone gy nein provit ane doen alzo my duencket. Hirumme est my to male sere to unwyllen, dat ik juewe gut altyt myt vorluese sal vorkopen, ik wolde, dat gy es my vordregen wolden, dat wet Got.
223. Wilhelm Richardes in Lübeck an Hildebrand Veckinchusen in Brügge. – s. a. etwa 1419 Novbr. 24.
- Rev. St.-A. Orig. Adr.: An Hillebrand Veckkinckhuzen to Brugghe. In dorso von der Hand des Empfängers: Wyllem Rychardes 2 ℔ 6 sl. gr. Das Datum nach dem Briefe vom 18. Dezbr. 1419.
Vruntlike grote tovoren an mynen guden vrunt. Hillebrant Vekkinckhuzen wetet als gy van hir sceden als umme dat gelt, dat gy my noch schuldych syn unde dat my juwe werdinne geven solde, wetet, dat gy my schuldych bleven 15½ mark Lubisch, dat Beltzsche laken afgerekent vor 7½ mark unde des geldes was 23 mark. Aldus so blef et 15½ mark, also hebbe ik et gerekent. Hir dont wol unde gevet mynen neven Hans Richerdes vor 2 ℔ 6 sl. gr., dat es dat ℔ gr. gerekent 4 sl. myn van 7 mark Lubisch. Also wolde ik et hir nu wol kopen. Hirume so dont wol unde gevet Hans vorscreven dat gelt jo to danke. Ik en wel ju anders nycht to scryven op disse tyt dan gebeydet to my. Gescreven to Lubeke op sunte Peters avent van Meylaen.
- ↑ 11. Novbr.
Anmerkungen (Wikisource)
- ↑ Korrigiert nach Berichtigungen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 247. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_247.jpg&oldid=- (Version vom 31.7.2018)
