Seite:Briefwechsel Hildebrand Veckinchusen 296.jpg

Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

	Wilhelm Stieda (Hrsg.): Briefwechsel Hildebrand Veckinchusen

schryvet also daz ich hir in der venckenysse nycht en darf vervallen unde sendet myr daz dinck myd den ersten her. Item so sendet myr auch 1 machtbryf, sal ich daz ghelt inmanen van Kord uter Olpe.

By myr Kornelies Veckinchoussen.

271. Bertold Herentrey und Tideman Brekelvelde an Hildebrand Suderman, Hildebrand Veckinchusen, Johan Kavolt und Everd van Meghen in Brügge. – 1421 Juni 10.

Rev. St.-A. Zeitgenössische Kopie. Adr.: An Hyldebrand Suderman, Hyldebrand Vockinchusen, Johan Kovolt unde Everd van Meghen to Brugge littera detur. In dorso von der Hand des Hildebrand Veckinchusen: Dyt es dat sedel van den 2200 Rynschen gulden, de Gobbelinus Marte to Lubeke antworde Tydeman Brekelvelden unde Bertolt Herentreye, 1424 jar 11 dage in settember.

Vruntlike grote unde wes wii gudes vormoghen tovoren screven. Leven vrundes, ju gheleve to wetene, dat uns Gobelinus Marte gheven hevet laten, dat wy entfanghen hebben to juwer behoff 800 Rinsche gulden, dartou noch ghelt, de werde van 1400 Rinschen gulden alse gherekent den Rinschen gulden op 15 sl. Lub. also vele gheldet de gulden hiir in betalinghe. Dit is tosamene 2200 Rinsche gulden, de maken in Lubeschem gelde 1500 unde 62½ mark Lub. Hiirvan hebbe wy Gobelinus weder geantwordet alse wy ene inscriift ghegeven hebben 27½ mark Lub. Dat ander welle wy ju overwesselen mit den ersten, dat wii kunnen. Kunde gy des daer en deels opnemen hiir to betalene, dat duchte uns wol gut wesen, so en dornte gy ummer neyn eventur stan. Hirop weset vordacht, wante uns dunket, dat et nu nicht vele schelen en wel van dar herwardes unde van hir ghentwardes. Wy wellen des besten ramen. Hirmede siit Gode bevalen. Ghescreven op sunte Barnabe avend anno 21.

Bertold Herentrey unde Tiideman Brekelvelde.

272. Engelbrecht Veckinchusen in Brügge an Hildebrand Veckinchusen in Antwerpen. – 1421 Juni 15.

Rev. St.-A. Orig. Adr.: An Hildebrant Veckinchusen to Andorpe littera detur. In dorso von der Hand des Empfängers: 16 in junejus.

Vruntlike grote tovoren gescreven unde wes ic gudes vormach. Hildebrant, leve vedder, dat ic juwen bref wol vorstan hebbe unde ic hebbe myt unsem werde Jacob Schoteler gesproken, de seget my, dat em nutte duchte, dat gy hir qwemen. Vedder, des en rade ic ju nicht by ju lyf, dat gy hir komen, wente so my duncket, so solde Jacob wol seyn, dat he buten der list bleve; wo et ju gynge, dar en solde he nicht vele umme geven. Unde ok alse gy scryven, dat ic unde Johan Walkyn dar solde komen, des en kan ic nicht to wege gebryngen, dat ic van hir komen kan. Mer wy wyllen myt Lensendyke hir spreken unde ander vrunde, wes de raden, dar wyl wy ju by Walkyn wol schryven to Andorpe, de sal dar komen, alse my unse wert

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 173. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_296.jpg&oldid=- (Version vom 31.7.2018)