|
Wilhelm Stieda (Hrsg.): Briefwechsel Hildebrand Veckinchusen |
|
|
uns were ghelt gheantwort, dat wolde wy tosamene overwesselen. Wulff meinde to segghende, et ghinghe ju an juwe ere unde wolden dat leyde opdriven. Mer se hebben affghelaten, alse wy ju to Brugge wart ghescreven hebben.
Item, Hildebrant, alse gy Margreten unde my ghescreven hebben unde Hinrik op me Orde unde my, dit hebbe ik altomale wol vornomen unde ik en wet wat ik ju dar op scriven sal. Ik hebbe ju vuste breve to Brugge wart ghescreven, ik hope, dat se ju to Collen komen solen, alse men wet, dat gy dar sin. Wy leyten Herman Derssow den tymean altomale, dat schippunt vor 12 mark an dat ghelt, dat gy Jurghen Junghen schuldich weren, mer Herman Derssow en wolde van den 18 Rinschen gulden nicht weten, de ju Jurghen schuldich is. De moghe gy van Jurghen manen laten, wes dar over lopet van al deme tymeane boven Jurghens ghelt, dat nemet Hinrik Kule unde Hermen van Stiten in minringe des gheldes, dat gy en schuldich sin unde de tymean hevet in al bliventes gheweghen 26 schippunt unde 14 lispunt min 2 markpunt. Dit lopet to ghelde, alse se dat Margreten in scriifft gheven hebben, 300 unde 20 mark 5 sl. 4 ₰. Hir moghe gy juwe rekeninge op maken, wat gy Kulen noch schuldich sin.
Item, Hildebrant, alse gy Hinrik op me Orde unde my ghescreven hebben, dat gy uns 1 machtbreff van Collen senden wellen Hildebrant, vorwar ik vruchte, dat he nicht vele beduden en sole in desseme rechte, dat et over enem jare schein were offte over ½ jare, so heddet macht ghehat en yewelik wel segghen, dat gy en vorvluchtich man sin, dat Gode enbarmen mote, dat et darto komen is. Unde en wel vor uns allen nicht sin; men welt Margreten vorkeren, dat se enen guden rok off hoeke dreghet al en doet mens nicht, dat se et horet, so doet ment dar se des nicht en horet, Gode enbarmet. Ik seghedet er ghisteren avent altomale unde se stont my des to, dat et also is. Se wet de dinghe hir bet, dan gy don. Vorwar, Hildebrant, alse ik ju scrive, also iz et. Gode enbarmet, dat et mit ju so komen is, des ik luttik ghemeint hedde. De leve Got motet beter maken dan et sune is. Wiste ik ju mer to scrivene, ik screvet ju. Hirmede blivet ghesunt. Ghescreven des donnerdaghes vor sunte Margreten daghe anno 21.
Item, Hildebrant, de breve, de ik ju hir dede, de en sin nicht vortghekomen, gy steken se in juwe rekenscop. Dot wol unde scrivet my, wo dat et darume wesen mach. Merten, min swagher, hadde dar 1 paiimentbreff mede. Ik hebbe ju vuste breve to Brugge wart ghescreven.
Item, Hildebrant, her Hinrik Rapesulver is noch nicht van deme koninge komen. Ik en wet nicht, war Margrete dat ghelt nemen sal, dat he betalt sal werden unde som ander lude mede. Gode erbarmet.
282. Engelbrecht Veckinchusen in Brügge an Hildebrand Veckinchusen in Köln. – 1421 Juli 15.
- Rev. St.-A. Orig. Adr.: An Hildebrant Veckinchusen tho Kollen littera detur. In dorso von der Hand des Empfängers: 21 in jullejo.
Vruntlike grote tovoren gescreven unde wes ic gudes vormach. Hildebrand, leve vedder, ju geleve to weten, wo dat Tydeman Brekelvelde unde
Briefwechsel Hildebrand Veckinchusen. Leipzig: S. Hirzel, 1921, Seite 70. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_305.jpg&oldid=- (Version vom 31.7.2018)
