|
Wilhelm Stieda (Hrsg.): Briefwechsel Hildebrand Veckinchusen |
|
|
- Sekrets. In dorso von der Hand des Hildebrand Veckinchusen: 2 in den ouste.
Vrentlike grite thovoren unde wes wy guedes vormeghen. Wetet leven vruende dat wy juwen breff wol vornomen hebben, wo dat Gobelinues Marten dar by ju gewest sy unde hebbe ju en deel van unsen zaken, wo de geleghen sin, to kennen geven unde ok dat he uns alle sake to kenne gheven hevet, wo se geleghen sin mit mer worden in juwen breff hebbe wy untfangen unde wol vorstaen. Item so geleve ju to weten, dat uns Gobelinues Marten alle sake to kenne gaff, wo dat he gevaren hadde, van em gheboert; wy beden ene, dat he wol dede unde verhalde de zake vor den olderluden unde vor deghene, de vor olderlude gestaen hadden, do ze van em alle zake vorstaen unde gehoert hadden. Wy begherden eres gueden rades, wo dat wy vort mit dem hovetbreve varen zolden, wy en wolden suender eren raet nicht doen, also wy alsus lange anders nicht gedan hebben dan by erem rade. Wy doen telken alse, ze vorgaderen vormanynge, se wysen uns altos aff, alse ze altos gedan hebben unde noch doen ze dat zelven. Wy en moghen anders nicht van en hebben, dat uns to guede werden mach, dat wy lyden moten to der tyd, dat Got beteren mote unse noet unde unse verdreet, dat moge wy Gode claghen in den hemel, de mach unse gebrech beteren, uns duencket, dat ze dat nicht doen wyllen. Item, so wetet leven vruende, dat Evert van Meghen unde ik Hans Covolt alse beraden zin unde ok altos anders nicht beraden sin gewest dan dat wy hovetbreff nicht overgeven wyllen unde untfangen de 600 gulden. Wy hopen des dat de raet van Lubeke nen breff overgeven zal, dat en sy mit unsen wyllen. Uns duncket guet, dat wy den breff dar staen laten in gueder duelt wente to der tyd, dat wy wol beraden sin, wo wy dat darmede holden wyllen. Item, so wetet leven vruende, dat en del van den gelde, dat Gobelinues Martin staen leet to Lubeke, hir overgekofft is; dat zelve gelt is hir gerosteret under denghenen, de uns dat hir zolen betalen van Hilbrant Veckinchuesen weghen, dat uns doch to unw…[1] wy nicht beteren moghen unde ok so hevet Hilbrant Veckinchuesen overgeven …[1] pinxtemarket Engelbrecht Veckinchuesen, dat he van dem gelde hebben zolde, dat Gobelinues mande van dem bisscop van Brandenborch van den 2800 gulden 50 ℔ gr., dar em de olderlude breve upgegheven hebben, dat doch by unsen wyllen nicht gescheen is. Desse 50 ℔ gr., de sin em to Lubeke betalt up der olderlude breff by Hillebrandes overgeven. Hilbrant Veckinchusen, gy weten wol, dat gy de betalinge nicht mede annemen wolden, darumme dat wy Gobelinues utsanden an den bisscop van Brandenborch alse van den 2800 gulden, dar wy ju umme beden, dat gy de betalinge mede zolden angaen, dat gy nenerleye wyss doen wolden unde spreken, gy wisten wol, wor gy dat juwe manen zolden. Wo komt nue dyt to, dat gy de 50 ℔ gr. Engelbrecht overgeven hebben unde gy an der betalinge nicht delen wolden unde ok vele ander darto noch rosteret hebben van iwer wegen? Alsus so hebbe wy gebrech van dem enen vore van dem anderen, na dar wy nicht wol anezin. Got beter alle gebrech.
Briefwechsel Hildebrand Veckinchusen. Leipzig: S. Hirzel, 1921, Seite 73. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_308.jpg&oldid=- (Version vom 31.7.2018)
