Seite:Briefwechsel Hildebrand Veckinchusen 310.jpg

	Wilhelm Stieda (Hrsg.): Briefwechsel Hildebrand Veckinchusen

de ju werden muchte, so bleve unse wert buten der list. Dyt duchte my best syn, wente de lude syn noch nicht wol bedacht, ju lange dach to geven, et en were, dat men en borgen stelde, dat en wyl nicht syn, se solen syc noch wol bet bedenken. Vort vedder, alse gy scryven van dem pande, de Seyer hevet, ic hebbe em gebeden, dat he my de pande volgen late, ic wolde em borgen stellen, dat hey de 200 gulden solde in de mysse hebben, des en wolde he nicht doen, so dat he my antworde, he wolde de pande Johan de Wreden antworden; wes dar mer van 200 gulden afqweme, dat wolde Johan de Wrede in mynnerynge van siner schult beholden, dat gy em schuldych syn, hirna wetet ju to rychten. Ic en wet ju sunderlige nicht to scryven. Mer hir en syn noch gene schepe van der Ryge komen, so dat ic tydynge van dar hedde, so wolde ic my na dem Andorpper markt to Liflande wert reden unde wan ic dar byn, wes vrunden dan gudduncket, dat wyl ic doen unde wyl, of Gofd wyl, tegen den Ypper markt hir wedder syn. Hir en is nicht vele gudes, nochtant so en wylt nicht vele gelden. Hirmede so spare ju God gesund. Gescreven up sunte Madalenen anno 21.

Engelbrecht Veckinchusen in Brugge.

Vort vedder, so en hevet Bertram Rennenberch hir gen gelt overgemaket noch was gesant, so dat Johan Bartun van genem gude noch gelde vornemt; hir wetet ju ok na to rychten.

286. Heinrich Hoep und Bernt Pleskau aus Brügge an Hildebrand Veckinchusen in Köln. – 1421 Juli 25.

Rev. St.-A. Orig. mit den Resten des Sekrets. Adr.: Deme erwerdeghen manne Hildebrant Vickinghusen to Kollen detur. In dorso von der Hand des Empfängers: 11 in den ouste 1421, Bernt Pleskouwe Hinrych Hoyp.

Vruntlike grote unde wes wy gudes vormoghen. Hildebrant gude vrunt, juwen bref ghescreven den ersten dagh in julyo, inholdende alzo danne ghelt alzo gy schuldich sin, alzo juwe lateste sedel utwiset, dat gy Gherde van Mynden overgheven unde eft dat ghelt van deme koninghe overkome van Lubeke, dat gy dar so vele af willen do^en betalen, went gy dat bo^ek willen slicht hebben vor alle dink unde gy wolden, dat gy er in dat bo^ek klar ghescreven hedden, alzo sik dat ghebo^ert umme dat dar nemant up to seghende hebbe unde gy ju vormoden vor Andwerper market nicht by de hant to komende, unde wy rekenschop scholden do^en unde oft wy dat willen in dat bo^ek scriven, alzo dat zedel utwiset, dat wy dat don moghen: mank meren worden hebbe wy wol vorstan unde begheren ju to wetende, wo dat hir van des koninghes ghelde overghekoft is van Lubeke 200 ℔ gr., alzo dat Ghert van Mynden unde ik Bernt Plescouw darup deden en rostement up en recht, wes dar were mank den 200 ℔ ju tobehorende umme dat wy vorvaren dat ander lude dar wolden up rosteren alzo et ok schagh, alzo dede wy dat myt den ersten alzo wy et stilkest konden. Nu hebbe wy vorvaren wo to Lubeke vordert sin van des koninghes ghelde 50 ℔ gr. van juwes neven

Empfohlene Zitierweise:
Briefwechsel Hildebrand Veckinchusen. Leipzig: S. Hirzel, 1921, Seite 75. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_310.jpg&oldid=- (Version vom 31.7.2018)