weder komet unde gy seyen wol, wat trostes gy to Kolnne an vrunden, den gy grot gud ghedaen, de hadden noch myn sole gy an so in andern vrunden vynden, doch hulppe ju Got op vrye vote, so mochte gy seyn, wat gy an vrunden hedden. Ic hebbe vele an vrunt ghescreven in Lyflande, men ic vynde numment, dey gelt ruemen welle. Got betert al umme. Ghescreven 13 dage vor mytvasten anno 23 jar.
352. Johan van dem Bokele in Lübeck an Hildebrand Veckinchusen in Brügge. – 1423 März 15.
- Rev. St.-A. Orig. Pap. Adr.: Hildebrand Veckinchusen tho Brucghe. Darunter von H. V. Hand: 1423, 29 in merte.
Salutem in domino. Wetet leyve om Hildebrand Veckinchusen dat ich juwen breff wol vorstan hebbe unde dat gy begherende sind, dat ich darover wolle komen umme juwe sake wyllen, darop so wetet, dat ich des nicht to weghe en kan ghebrengen umme myner sake wyllen, wante dey noch hir ungheslichtet sind unde ich behovede bet, dat ich tegen dat vorjarn to Lyfflande wort seghelde und manede dey ghene, de my by 60 ℔ groten hovetstols vor untholden unde dergeliken in Prossen ok wol also vele off mer dan 60 ℔ groten unde my dunket som lude solden my hir ok gerne wat voruntholden off affkryghen, hedden se de macht darumme so moet ich selven by mynen dinghe blyven, bet ich dar bet gheslichtet hebbe off God well unde dat en kan vor dessen passchen nicht wol ghescheyn, dat ich van hir kunne komen. Hirumme so bespreket ju harde wol umme dat recht, wante na mynen vorstan so geyt de zwertsyde in allen rechten vor der spillensyde, darumme so duncket my gud, dat gy by tyden darop denken und laten enen komen, de ju also namaech sy off negher dan Eingelbert Veckinchusen ist, wante ich hope, dat gy des nicht en bogeren, dat ich de reyse, anxst, arbeyt unde kost umme nicht don sal unde dat gy dan alikewol eynen anderen hebben moeten. Hirvan scryvet my ein antworde met den ersten, wante ich dencke hir to wachten bet ich hirop antworde von dessen breyve unde ok van Eingelbert van dessen selven saken. Hirunder mach ich myns dinges wat slechten. Item so hebbe ich met unsen vrenden ghesproken unde hebbe en ghesecht, dat se umme desse sake in Lyfflande scryven unde laten enen overkomen de ju de neghermaech is dan ich ju byn offt van node worde, datt men darnicht na wachten en droffte, dat he by der hand were, welt se darumme scryven, dat es my leyff, men my dunket dat men myns rades in geynen sticke volgen en wyl, men de lude wellen eren synne volghen dey doch nicht nuette en ist. God beterd, de ju bewaren mote unde al unse guden vrunde. Ghescreven des manendaghes na mytvasten anno 23 in Lubeke.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 368. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_368.jpg&oldid=- (Version vom 31.7.2018)
