my doen over dat ghelt fangen. Aldus so bin ick qwyt 368 Rynsche gulden; also vorscreven stet. Darto wyl dey man van my hebben noch 210 gulden, also vorscreven es, darto wyl hey velle schaden reken. Darto hevet hey 1 breyff van Kornneles dynen son, dar wyl hey ok 210 Rynsche gulden van hebben unde ok den schaden darboven, so wyl hey dey pande vorloren reken; darop wyl Karnneles op my reken, so ick my vorstan hebbe vor dey pande 400 Rynsche gulden. Dyt es 1 vreselyk dinck, dat du ghemaket hevest, dat du Karneles dynen son nicht ghevest van myr weghen 210 Rynsche gulden, so hedde Karnneles sinen breyff unde mynen breyff ghelosset; unde hedde hey sin dynck wedder kreghen, so hedde alle dinch slecht unde recht ghewessen. Al dyt ghebrek stet op dy, dar wyl ick nicht mede lyden. Ick wyl hebben, dat ick schuldych sy to hebben, hirvan dat es al dat my hirvan boren sal van rechtes weghen van dy so yt vorscreven es.
Item Greteke wyff, dyt selve sedelken lat mynen broder lessen; alst he yt lesen hevet, so beholt du dat unde segghe eme aldus, dat hey my den breyff van den man van Numeghen do hebbe van den 210 Rynsche gulden unde dat hey my darto do hebbe 158 Rynsche gulden offte dat hey my den breyff van Bacharach do hebbe vor 132½ gulden unde darto 25½ Rynsche gulden. Unde dar einboven, so beghere ick van sinen son Korneles ene quytancye ghe dat my Korneles aller sake vorlate unde quyt schelde. Greteke, wan myn broder desse 3 punte vallenbrucht hevet, so sy ick hirinne ghepayet unde ander nicht. Segghe mynem broder, dat hey seck hirna rychte, dat dyt dus gheschey. Des beghere ick ein antworde sunder sument, wat hey hirto doen wyl edder nicht. Darna so mach ick my rychten. Darmede so mote ju Got unde my unde alle vrende altos bewaren. Ghescreven 4 daghe in den ouste 1423 jar.
359. Hildebrand Veckinchusen an seine Frau Margarethe Veckinchusen in Lübeck. – 1423 Aug. 9.
- Rev. St.-A. Orig. Pap. mit den Resten eines grünen Siegels. Adr.: An Margreten Veckinchusen in Lubeke lyttera detur.
In dem namen uns heren, Greteke, leyve wyff, dy gheleyve to weten also du wol maghest weten, dat Evert Moyelyk met unser dochter Trudeken solde hebben to brutschatte 800 marc Lubesch. Hirop so bewysste ick emen tom ersten to untfanghen by Johannes Vreysen 115 marc 3 sl. 3 ₰ Lub. Item darnest solde emen Tydeman Brekelvelde gheven myn part van der syde, des sal sin, want al betalt wert, 218 marck Lub. Item so sal emen Herman Platenslagher unde Berttram Renenberch gheven overal, wan dat ghelt van den fyghen inkommet, mer dan 250 marc Lub. Item so sal emen myn broder gheven 100 marc Lub. So wanner unse swagher dyt ghelt hedde, so hedde hey tohope 685 marc Lubesch; aldus so solde unsem swagher dan unbreken noch van al, wan hey dyt vorschelt hedde, 115 marc Lubesch. Hirto stet noch wol rat dat wy emen dyt noch mochten betalen. God mote uns beraden, dat wy emen dyt betalen moyten unde vort, offte emen wes
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 379. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_379.jpg&oldid=- (Version vom 31.7.2018)
