Hirmede bevele ik ju Gode. Ghescreven op sunte Thomas dach von Kanthelberge anno 25.
411. Hildebrand Veckinchusen an Margarethe Veckinchusen in Lübeck. – 1426 Januar 5.
- Rev. St.-A. Orig. Adr.: An Margreten Veckinchusen in Lubeke lyttera detur.
In den namen uns heren Jhesus Christus. Leyve wyff, dy gheleyve noch to weten, woy dat ick Tiideman Brekelvelden unde Berttolt Herentreye noch hebbe screven umme 100 marc Lub. op rente. Dar sette ein pande vorn op dat du der so velle hevest. Hevestu er nicht so velle, so sette em so velle, also du er hevest, so wes daran einbreken sal, dat wyl ick eren vrenden hir vorfullen, dey my van ere weghen dat ghelt solen geven, op dat se wol vorwart solen sin. Hirinne so rame des besten myt em, dat ick dyt ghelt mach hebben sunder mer vortreckes. Wante ick moyt dyt ghelt hebben to myr not unde ick mach nicht bet gherleye wys. Darumme so maket hirmede also dat et vor uns allen sy, dat rade ick dy op al, dat du van Gode unde my heldest. Do na rade Tiidemans unde Bertoldes Herentreyes, do den mynsten schaden, den du kanst. Uns sal doch banghe ghenoch werden, do in allen saken dat beste unde denne gode unde wes vrolyck myt unsen kinderen unde vrenden. God dey wel uns nicht underweghen laten by siner ghenaden.
Item so vraghe Hildebrant Hoyman offte uns nicht sole werden van den terlinch Alsche laken, dey hey van unser weghen vorkoffte Wyckbolt van der Wyck, dar wy van tachter sin noch 192 marc 13 sl. 7 ₰ Lub. Ic wolde, dat wy dar wat van mochten hebben. Item so was uns Deryck Grybbe schuldych 18 marc Lubesch, dat emen Tydeman Brekelvelde vorkoffte; kan dar ok nicht van komen, dat mote Gode untbarmen. Vraghe dar Tydeman umme.
Item so screff ick Brekelvelden van den hus, also hey dy lesen hevet laten; darvan wyl ick van Syvert hebben 400 marc myn so vele also dey rente was, do du myt unsen kinderen ut den hus mostes. Hey sal my dat ghelt leveren effte den egendoem van den hus, wante hey solde dar lyff unde gud bysat hebben. Hedde my dat ein vromede wyllen doen, dat uns syns wyves moder dede, Syvert sals nicht ton eren vorantworden kunnen; unde ok so hevet uns Syvert vorsumet in unser borgherschap.
Item, so sal Syvert Evert Moelyk gheven dey 100 marc Lubesch, also du wol west.
Item, so es my Syvert noch schuldych dat overghelt von Karneles sinen soen, also ick dy in vortyden screff; woyvelle des was, dat vindestu wol in mynem breyve, den ick dy sante in vortyden.
Item, so sal uns Syvert noch betalen alle dey kost van Hildebrant Heyman unde sinen broder unde darto van kosten, dey wy van syr weghen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 420. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_420.jpg&oldid=- (Version vom 31.7.2018)
