hadden int hus van syr weghen so du wol west, des wyl ick nicht unberen, unde noch van velle anderen saken, dey ick to Syverde tosegghen hebbe. Wy hebbe emen to velle betrouwet, dat hey uns qualyken loent. Ick screff dy unde Evert Moelyk in vortyden enen breyff van den eghendom des hus. Den breyff oversey myt Everde, wante alle sake solen komen so yt behoren sal, wellet God. God late my myt leyve levenn, ick sal Syvert so utrychten so yt behoren sal, wyllet God.
Leyve wyff, so hevet Einghelbracht noch dyne cleder, so ick dy wol er ghescreven hebbe. Darto so hevet hey ok ander dinck van myr weghen; des ick al gheyne macht hebbe to brucken. Ok so kan ick nicht 1 pennynck van emen hebben, noch van Rennolt Swarten noch van Bokelle. Alsolde ick nummer mer vort etten sint dyt gude maghe, dat sal seck wol vinden hirnamals. Vrende ter not, vrende ter dot, vrende achter rugghe, dat es ene secker brugghe. Hedde ick nicht ghehat Petter van den Damme noch ander vrende, ick solde dar qualyken an sin ghewest in dessen vordretelyken tytlanck. Darumme est wol recht, dat ick sey betale er ick van hir schede; du noch ick, wy kunnen em nummer to fullen dancken.
Item so scryff my so wes dat dy Syvert ghelent hevet desse tytlanck.
Item over 4 jaren, do ick to Collen was by Syverde, do was hey an my vorsokende by Johannes van den Bokelle unde hedde ghernne gheseyn, dat ick emen vor deme rade van Collen emen opghedreghen hedde vor sin oghen al dat wy to Lubeke hedden hat unde darbuten. Unde solke sake begherde Bokel van syr weghen an my unde mende Syvert solde dy unde unse kinder nicht underweghen laten. Dat was dinch, dat my ut den kruppe noch nicht es, we uns allen. Hedde ick emen des bettrouwet, Syvert, do hey unsen pot al dat botte affghescument hadde, do hedde hey ghernne den mede ghehat, dat wy nicht myt alle hedden beholden myt unsen kinderen. Aldus so hevet hey by my nicht ghedan also 1 gud broder in vellen stucken. Sal ick leven, so sal hey my dat wol hoghelyken beteren, wor hey des nicht doen wyl, so wyl ick dat Gode claghen und dinen vrenden unde allen guden luden. Mer doch wyl hey noch sulven wol unde bedencken syck to rechte, so sal hey ghenade an my vinden, op dat alle dinch in vrendschapen hen gheleghet werde unde dat wy malk anderen vrentschop bewysen, dat solde wol godlyk unde erlyk sin vor uns unde alle unsse kinder unde vrende. Dey almoghende God mote dar sine ghenade in senden, dat alle unse sake gud mote werden; dat solde wol vor uns allen sin. Hirmede so mote dy God altos bewaren myt unsen kinderen unde vrenden. Ghescreven op der hilghen drey koninghe avent 1426 jar.
Leyve wyff vorsta alle sake wol unde make dar nicht velle worde van. Mach my ghelyk vor unghelyk wedderfaren, so sal ick my ghenoghen laten op dat alle dinch gud werde.
Item so scryff my alle dinen wyllen myt den ersten sunder sument unde segge allen vrenden gude nacht.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 421. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_421.jpg&oldid=- (Version vom 31.7.2018)
