broderen darsulves bi sunte Thomase butene an der stad gheve ik 100 marc Lub. to erem buwe, in deme ghelyken en jar umme alle wekene ene zelemissen to singhende to salicheyd myner selen. Item den Karthuserynnen buten Brugghe in Vlanderen gheve ik to erem buwe 100 marc Lub. Item wil ik dat men kopen schole 5 swarte Leydesche lakene unde schal darmede kleden teyn bedderve prestere, de des behuf hebben, und de kledere scholen ze dreghen unde vorsliten to der ere Godes mi in ere ghebed to nemende und dechtnisse. Item wil ik dat myne vormundere sunder togheringhe na mynem dode entrichten scholen mynem brodere hern Johanne Vikkinkhusen 800 marc Lub., dar he mede kopen schal 40 marc gheldes jarliker rente und der rente schal he brueken totiden synes levendes und der vullenkomene macht hebben unde vryheyd een ewich gheystlik leen darvan to makende in der besten wise alse em dat behaghed und vor unse und unsere olderen unde vrunde selen nüttest dunket. Darto gheve ik denne noch 200 marc Lub. alle ornamente mede to besorghende, der dar to behuf is und bevele em alzo darbi tho donde alse ik em des betruwe; wer et aver, dat he storve, er dat leen gemaket wuerde, so wil ik dat myne vormundere dat jo in vuller macht maken scholen, doch mynen rechten erven dat leenrecht darane to beholdende to ewyghen tiden. Item wil ik, dat men in dem ersten jare na minem dode enen bedderven armen prester senden schole to deme hilghen grafe unses heren to Jherusalem und schal em kopen een perd van 10 ofte 12 Lubeschen marken unde em sunderghes antwerden 30 dukaten den moniken to Syon to ghevende und dartho sunderich offer in dat hilghe graf und in de anderen hilgen stede to bringhende vor de salicheyd myner selen und deme sulven preestere, de reyse also donde, gheve ik vor sin arbeyd to lone unde to theringe 300 marc Lub., begherende dat he unsen heren God so lange alse he leved truwelken vor my bidde. Item wil ik, dat Gheseke myn leve husvrowe eren brutschat und wes ze anders to my brochte tovoren an wedder hebben schole umbeworen, dar enboven geve ik er 600 marc Lub. van mynem redesten und alle kledere, smyde und klenode, de ze to erem lyve plecht to dreghende alze eer de gegheven sint. Darto gheve ik er de helfte quyt unde vryg mynes huses, dar ik ynne wone und de helfte alle mynes ynghedomes utghenomen myn tafelsmyde, dar schal se anders nicht afhebben, wen dat ik er in myn bok totekend hebbe unde darmede wil ik dat myn husvrowe schole schichted und scheden wesen van alle mynem anderen gude. Item leved myn dochter Taleke mynen dot, so gheve ik er 200 marc. Lub. und werd se to manne beraden, so totekene ik er noch 1800 marc Lub. undde de helfte quyt und vryg mynes huses vorescreven unde de helfte mynes inghedomes unde wes ik eer van mynem tafelsmyde in myn bok totekend hebbe, also dat myne vormundere myne dochter bynnen der unberadenen tyd van mynen guderen truwelken scholen vorstan; weret aver, dat se unberaden storve, so wil ik dat, wes ik er also totekend hebbe gansliken blyven schole bi mynen overighen guderen. Item wurde my noch van myner husvrowen een kynd geboren mynen dot levende, deme kinde gheve ik ok 200 marc Lub. unde werd is mundich ofte to manne beraden, so schal id darto hebben 1800 mark Lubesch, scheghe des
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 428. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_428.jpg&oldid=- (Version vom 31.7.2018)
