ik ju nu scriven. Doch so hevet my Zyvert ghescreven, dat men des also vorramet hebbe, mer et en sy noch nicht vollentoghen unde ok so mot men aldink noch clarliker scriven unde setten dan ik et ju ut sinen breven scrive.
Int eiirste sal Peter de selscop ghansliken vorlaten aller ansprake unde borchtuchte unde bekennen vor deme rade, dat he der selscop schuldich sy van rechter rekenscop 14 000 mark Lub., de hey der selscop vorwissen unde vornoeghen welle in aller wise alse na screven stet.
In primo sal Peter der selscop overwizen unde vornoeghen to Auspurch unde in Swaven unde to Venediien unde to Praghe unde to Luneborge an allerleye gude alse de scriifft, de dar over ghemaket is, utwizet 8000 mark Lub. unde dat sulve gut sal Peter der selscop overlaten, antworen in allen enden, war dat es unde sal en des vullemacht geven, dat gut in welker market, dat et der selscop aller bequemest is op Peters eventur to voren unde to penningge alse se best kunnen tuschen dit unde vastelavende unde dan rekenscop darvan to donde in minringe der vorscreven 8000 mark Lub. Unde est dan, dat Peter der selscop vor dey 8000 mark ghenoch dan hevet, offte op de tyt noch ghenoch don kan, so sal de selscop Peter der pinliken claghe vorlaten also vele alse in en is. Iz et, dat Peter der selscop nicht ghenoch dan hedde vor de 8000 mark vorscreven, so sal unde mach dey selscop mit pinliken claghen volghen unde al eres rechtes unvorsumet sin, ghelik offte desse deghedinge ny gheschein en were, utghenomen wes de selscop an gude unde ghelde entfanghen hedde, dat sal men Peter an deme anderen ghelde affkorten.
Item iz et ok, dat Peter van dessen 8000 mark der selscop ghenoch dot, also vorscreven es, so sal Peter noch der selscop ghenoch don vor 1500 mark Lub. in minringe der 14 000 mark vorscreven unde kunde he des nich don, so sal he mit vriien willen in der stat thorn ghan unde sitten dar also langhe vor gheltschult, dat he der selscop de 1500 mark vornoeghet hebbe.
Item, Peter sal noch der selscop overwizen in schult to Venediien 1400 ducaten unde to Auspurch 1000 ducaten ok in minringe der vorscrevenen 14 000 marken unde by solken underschede were sake, dat Peter offte de sine van dessen schulden icht inghemanet offte entfangghen hedden, offte dat dey schulderners nicht tostan wolden, dat sey Peter dat schuldich weren, dar sal Peter der selscop ghenoch vor don ghelik den vorscreven 8000 marken sunder al arghelist.
Item sal Peter der selscop overgeven unde antworen laten de kamer to Venediien, de Peter aldus langhe van der selscop weghene in den Dutschen huse ghebruket unde besetten hevet mit aller tobehoringe, alse bedde unde beddegherede unde handbecken unde hantvat unde kisten unde bencke unde alle retschap, hir entheghen hevet de selscop Peter weder vorlaten 100 unde 28 ducaten unde Peter sal dey kamer der selscop vry unde quiit antworen van aller schult wegen.
Item wan Peter der piinlike claghe vorlaten werd, so sal Peter der selscop orveyde don unde beteringe don vor all smaheit to des rades seggen want Peter an vuste ere screven unde sproken hevet an vele einden, dat wy nein ghelt vor nemen wellen unde Peter sal richt unde rat op sik nemen.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 439. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_439.jpg&oldid=- (Version vom 31.7.2018)
