471. Hildebrand Veckinchusen an seine Frau Margarethe.
- Rev. St.-A. Orig. Pap. mit Hild. Veck. Handschrift. Vergl N. 237.
Item Greteke, leyve wyf, so wete dat dyt es dey rekenschap van al den karallen, dey ick to Lubeke stan hebbe. Ick hebbe nu vorstan in kort, dat dey karallen in Clawes Vrolinghes tunne in kort overquemen, darin ramen des besten myt Hoyman unde myn broder es, God danch, wol to Colnnen komen, mer hey hevet my gheyn bescheyt screven grot noch cleynen, des my tomale sere vorwundert in allen saken. Ok scref my Hoyman nicht, dat my ok nicht behaghet.
Item van den 62 snore sint worden 38 snore darto blyvet darto 5 korte snore, dey weghen 25 marc 5½ unsse.
Item van 40 snore sint worden 24 langhe snore, darvan blyven dar noch 4 korte snore unde 32 telen, dey weghen 16 marc troys myn 1½ unse.
Dyt es tohope 41 marc troysch 5 unsse, hir tohort 32 stenen van den karallen ofte telen.
Desse karallen stan tohope elk punt 9 gulden cronen, 16 unse vor dat punt gherekent.
Item so kosten dey karallen, dey ick Steven vorkofte unde dey to Lubeke quemen van Ossenbrughen van Sparenberghe und desse unde dey 11½ unsse, dey ick Sporenmaker mededan hadde, desse stonden tohope 71 ℔ 13 sl. 3 gr., elk ℔ gr. rekent vor 7 marc, so stonden desse karallen an Lubschen ghelde tohope 500 marc 24 sl. Lub.
Item so hevet Hoyman in handen ton ersten 48 snore korallen, dey weghen tohope 22 marc 3 unsse troysche wychte, darnest hevet Hoyman 16 snore, weghen 6 marc 5 unsse 5 enghels. Dus hevet Hoyman over al 29 marc troysch 5 einghelsche. Ick hope Hoyman solle dey karallen vorkoft hebben.
Item Greteke, leyve wyf, wert also, dat men dey karallen nicht konde vorkopen, dey Hoyman hevet, so machtu van 3 snore 2 maken so sey lykes macht maken, darinne so ramen des besten, dey korten snore kan man nicht wol vorkopen also dey langhen, sey moyten int leste ummers vorkoft sin, konde men sey allentelen vorhoyken, dat wer wol gud; ick hope sey sollen wol van der hant gan op den wynter; moghet nicht beter sin, so syt also; dyt es dey rekenschap van den karallen hirna machtu dy na rychten.
Desser karallen was over al 52 punt Vlamesch elk punt stont 9 gulden cronen, summa darvan in ghelde 71 ℔ 13 sl. 3 gr. Item so bringhet dy Fyteleken in enem breyve dey 2 slotel to den bussen.
472. Hildebrand Veckinchusen in Brügge an seine Frau Margarethe in Lübeck.
- Rev. St.-A. Adr.: An Margreten Veckinchusen to Lubeke lyttera detur.
Int erste 1 terlinch, es inne 26 Alstedesche halve.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 462. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_462.jpg&oldid=- (Version vom 31.7.2018)
