NVn fürhin mag keyn horologium gemacht werden ausserhalb der yenen / so in dem obgesetzten fundament beschriben / es sey dann das in dem selbigen horologia jngeschriben seind die 12 zeychen des hymmels. Darumb die selbigen jn zuo schreiben / muostu haben ein tafel / darinn zuo finden die hoehe der sonnen / zuo allen stunden in einem yeden zeychen. Darumb ist dir gesetzt allhye ein tafeln vff 49 grad des polus hoehe / darinnen du zuo allen stunden / in einem yeden zeychen / von zehen zuo zehen graden die hoehe der Sonnen finden würst wie dann hernach volgt. Der zuouersicht wo du ferner kommst / werdest bey den erfarnen andern tafeln auff andre polus hoehe gnuogsam bekommen.
WIltu nu die Zwoelff zeychen des hymmels in die stundlinien beschreiben / so soltu für dich setzen den Quadranten / in massen wie er hyeuor gerissen ist / vnd die linien. a. c. zeüch lenger herab gegen dir / als lang du dann den stefft in das horologiom vff der 12 stund linien eingesteckt haben wilt / vnd zeychen das end der selbigen lenge mit. g darnach auß dem selbigen puncten. g. zeüch ein Paralel linien / dz ist ein lini die zuo gleicher weit stet gegen der lini. b. a. doch sol sye gegen der rechten hand weit hinauß gen vnd gezogen werden / vff das man die wenigsten grad grad daruff erlangen mag / vnd die selbig lini zeychen am end mit h. Darnach gee in die vorgesetzten taefelin / vnd suoch im anfang des kreps die hoehe der sonnen / so es 12 schlecht / so findestu 64 grad vnd 30 minuten / mit diser zal geh in den Quadranten / vnd wie die selbig zal gefunden würt / vff das selbig end lege die Regel mit einem theyl / vnd mit dem andern theyl auff den puncten. a.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 24. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_24.jpg&oldid=- (Version vom 31.7.2018)
