vnd wa die Regel die lini g h abschneidt / da mach ein puncten i. Nun soltu vor dir haben das horologion horizontale / gerisszen mit seinen stund linien / wie oben angezeygt ist / darnach nym den driangel oder Rectificatorium / vnd setz jn auff die mittag lini / mit dem ort a e das der punct a des driangels steh inn dem puncten a des horologions horizontale / vnd als lang du den stefft haben wilt / oder an welchem ort du den selbigen auff die 12 stund lini eynstecken wilt / daselbest mach ein puncten k auff der mittag lini / des gleichen auff dem driangel / Nach solchem zeüch ein gerad lini überzwerch auß dem puncten k des driangels / biß inn die linien a d als lang nun solcher zwerchstrich ist auff dem driangel / also lang soll der stefft sein der eyngesteckt würt in den puncten k der 12 stund lini.
Nun geh widrumb in den quadranten vnd nym mit mit dem circkel die weitin g i auff der lini g h mit solcher weitin setz den circkel mit einem fuoß in den puncten k auff der mittag linien / vnd mit dem andern mach ein puncten l auch auß der selbigen mittag lini vnder das k herab / doselbs ist die hoehe der sonnen / im anfang des kreps so es 12 schlecht. Darnach geh widrumb in das taefelin zuo der 11 stund vormittag / oder 1 nach mittag / vnd suoch sein grad vnnd minuten / so wüstu finden 61 grad vnd 36 minuten / auff die selbige zal leg abermals die regel in dem quadranten / vnd mit dem andern theyl auff das zentrum oder puncten a / vnd wo die regel überschneidt die lini g h / do merck aber den puncten mit m / solchen puncten m vnd g nim wider mit dem circkel nach seiner weiten ab / vnnd trags mit einem fuoß auß dem puncten k auff die 11 stund lini / des gleichen schlag den circkel herumb auff die ein stund / also thuo zuo allen stunden / vnd so die puncten des kreps vff allen stund linien[1] bezeychnet seind / so zeüch sye subtil mit einer linien zuosamen /
Anmerkungen (Wikisource)
- ↑ so entziffert
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 25. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_25.jpg&oldid=- (Version vom 31.7.2018)
