SEtz für dich die stund lini des horologiums Equionoctialis mit sein zwerch lini leyter weiß / Darnach nim die lenge des selbigen steffts mit dem circkel / vnd setz die selbig weitin mit eim fuoß in den puncten .a. des quadranten / vnd mit dem andern fuoß mach ein puncten auff die lini .c.a. vndersich gezogen ( wie im horizontale gsagt ist / dem selbigen zeychen mit .r. auß disem puncten .r. zeych ein paralel lini in gleicher weitin gegen der lini .g.h. die zeyche am end mit .s. Darnach geh in die nachuolgende taffeln / vnd nim die grad vnd minuten der zwoelfften stund des kreps / so würstu finden 66 grad vnd 0 minuten / vff die selbig zal leg die regel im quadranten mit eim theyl / vnd mit dem andern theyl vff das .a. vnd wo die regel abschneit die lini .r.b. do mach ein puncten .t. Darnach nym die weitin .r.t. mit dem circkel vnd setz ein fuoß in den puncten .b. darinn der stefft stecken soll / vnd mit dem andern fuoß mach ein puncten .v. vff der zwoelff stund lini des equinoctialis oder auff der 6 stund lini des Orientalis oder Occidentalis / dasselbig ist der anfang des kreps oder steynbocks mit der sonnen hoehe / Dergleichen thuo mit dem andern vor vnd nahe mittag / vnd zeychne die 12 zeychen alle auß dem puncten .r. auff yede stund lini / wie do selbst auß obgeschribnem grund erlernen magst / vnd in der figur vorstot.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 27. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_27.jpg&oldid=- (Version vom 31.7.2018)
