zeychen / vnd mit dem andern fuß mach allweg puncten auff der lini ♈ vnd ♎ / vnd zeüch dann auß dem d durch die selben puncten lini / darnach wo die 12. zeychen lini dise lini abschneiden / dise wettin trag auß dem d widerumb auff die stund lini / wie zuovor auch gelernet ist / vnd zuouor figuren anzeygt. Nun werden etlich stund lini / als die kürtzesten über das f gehn / von wegen der schreg / da zeuch blind rissz durch / vnd trag sye dann auch ab / wie vor gelert ist / vnd du in der nachfolgenden figur sehen würst.
SO du wilt die Planeten stunden eynschreiben / so fahe an in der mittag lini der halben glocken stunden gegen 1. oder gegen 11. auff welcher seiten du wilt / vnd nymm die ersten stund / vnd von der nechsten / darnach das drittheyl / so die zehen oder zwey in drey gleich theyl geteylt würt / vnd daruon ein theyl zuo der ersten stunden genummen / so bleiben noch zwey theyl / vnd wo das drittheyl abschneidt den steynbock / oder im horizontali den ♋ / da selbst hin leg die regel mit eim ort / mit dem andern ort wo sich das ein oder zwey im equinoctial abschneidt / dahindurch solt du ziehen die planeten stund / da hastu dann an eim ort 5. so durch eins gezogen ist / vnnd 6. ist allweg auff der mittag lini / das sunst auff der halben glocken stunden allweg 12. ist / vnd so du durch die 11. gezogen hast / so hast du 7. Nachmal far für mit den andern vhren / vnd nym eins drittheyls minder dann die 10. oder 2. also das du alweg 4. dritteyl zuo einer planeten stund habst / vnd allweg durch die nechst halb glocken stund im Equinoctial gegen der mittag lini durch zeüchst / vnnd also wo sich 5. im Equinoctial durch schneidt / da beschreib 1. vnd da 4. durchschneidt / beschreib 2. fürtan 3. durch 3. vnd durch eins 4. 5. 6. 7. 8. 9. 10. 11. durchschneidet 7. der halben glocken stunden / wie du dann inn der figur bericht nemen würst.
ITem an ein yetlich mauren horologia zuo machen / sye sey wie sye woelle / die selbigen auß schleg zuo finden auff alle seitten / oder das es hangend sey im zenit / hyndersich oder fürsich / das such durch zwen grad verruckter rissz a a / vnd b b / den ersten zuo der zwerchen / den andern zuo der vffrechten lini / daran sich
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 54. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_54.jpg&oldid=- (Version vom 31.7.2018)
